Kona í hverju liði á Íslandsmóti skákfélaga?

Í fyrri frétt um aðalfund SÍ misfórst að birta lagabreytingartillöngu frá Lenku Ptacnikovu, Guðfríði Lilju Grétarsdóttur og Páli Sigurðssyni um að ein kona skuli hið minnsta tefla í hverju liði.

Lagabreytingartillögur

lagðar fram af Lenku Ptacnikovu, Guðfríði Lilju Grétarsdóttur og Páli Sigurðssyni fyrir aðalfund 3. maí 2008 

Skáklög SÍ

3. kafli Íslandsmót skákfélaga 

19. grein

Keppendur skulu vera fullgildir félagsmenn þeirra taflfélaga sem þeir tefla fyrir.  Raða skal keppendum í sveitir og borð eftir styrkleika.  Ekki er leyfilegt að breyta röð keppenda eftir að keppni hefst.  Keppandi getur flust upp eða niður um sveit hvenær sem er keppninnar en heildarröð keppenda verður að haldast.  Komi lið ekki til keppni án orsaka tapar það skákum á öllum borðum.  Komi slíkt fyrir tvisvar skal liðið dæmt úr keppninni.  Í hverri viðureign skal a.m.k. helmingur liðsmanna hverrar sveitar vera íslenskir ríkisborgarar eða hafa verið með lögheimili sitt á Íslandi undanfarið ár. 

Breytingartillaga: 

Í lok 19. greinar bætist við eftirfarandi klausa:

Frá og með Íslandsmóti skákfélaga 2009-2010 skal að minnsta kosti ein stúlka/kona vera í sérhverri sveit mótsins.

Greinargerð:

Í löndum eins og Frakklandi, Spáni, Bretlandi og víðar er það ófrávíkjanleg regla að ein stúlka/kona sé í hverri sveit þegar félög og lið keppa um meistaratitilinn í skák. Þessi tillaga er því lögð fram með fyrirmyndum erlendis frá. Hugsunin er einföld: Með því að skylda félög til að hafa a.m.k. eina konu í sveitinni hjá sér á Íslandsmóti skákfélaga er tryggt að sérhvert félag í landinu hlúi á einhvern hátt að skákiðkun stúlkna/kvenna og leggi kapp á að þjálfa þær og hafa með í liðinu. Þetta hvetur um leið félögin til að leggja sig fram við að kveikja áhuga stúlkna/kvenna á skák, leita uppi áhugasamar stúlkur/konur og tryggja þátttöku nýrra kvenna sem annars væru ekki með á skákmóti. Þá er einnig mun líklegra að þær sem tefla með liði á Íslansmóti skákfélaga verði með á öðrum og fleiri skákmótum. Ef þessi breytingatillaga yrði að veruleika mundi íslenskt skáklíf sjá margfalt fleiri íslenskar konur en áður hafa sést saman á skákmóti. 

Framkvæmd þessarar tillögu vex án efa ýmsum í augum en þá er til þess að líta að vel virðist hafa tekist til í þeim löndum sem þetta hefur verið tekið upp. Það væri í það minnsta vel þess virði að láta á þetta reyna og sjá hvernig til tekst. Hér er lagt til að þetta taki gildi frá og með árinu 2009-2010 þannig að félögin hafi rúmt ár til að undirbúa breytinguna. Næsta Íslandsmót skákfélaga 2008-2009 færi því fram með hefðbundnum hætti en mótið þar á eftir yrði með konu í hverri sveit. 

Í þessu samhengi er vert að taka fram að í reglugerð um Íslandsmót skákfélaga er lagt upp með að einungis 6 séu í liði í öðrum deildum en fyrstu deild. Full ástæða er til að endurskoða þessa reglu og spyrja hvort ekki eigi að hafa 8 liðsmenn í öllum sveitum allra deilda, þar af eina konu. Þetta þarf hins vegar ekki lagabreytingu heldur ítarlega umræðu á aðalfundi og umboð til stjórnar um að breyta reglugerðinni. Ef samþykkt er að ein kona skuli vera í hverri sveit væri í það minnsta ástæða til að hafa 7 liðsmenn í öllum öðrum deildum en fyrstu deild (þar væru áfram 8), en eðlilegast væri etv. að í öllum deildum væri sami fjöldi liðsmanna, alls átta. Þetta þarf sem fyrr segir að ræða á komandi aðalfundi.

Athugasemdir

[Arnar Gunnarsson (IP-tala skráð) 5.4.2008 kl. 11:48]

Hommar, lesbíur og glæpamenn. Svo maður tali ekki um rauðhærða.

Hvenær fá þessir hópar sinn filltrúa í skákinni og 1 sérborð á Íslandsmóti Skáklfélaga? Ég vil svör.

Spurning hvort þá þurfi ekki lögregluþjón við hvert borð. Þá útaf skærum milli homma og rauðhærðra vegna Eurovision.

Mjög sniðug tillaga engu að síður... 

[Bjarni Jens Kristinsson (IP-tala skráð) 5.4.2008 kl. 17:29]

Þó eitt athugavert. Eins og breytingartillagan er núna er hún mjög óréttlát. Betra væri að segja:

Í lok 19. greinar bætist við eftirfarandi klausa:

Frá og með Íslandsmóti skákfélaga 2009-2010 skal að minnsta kosti ein stúlka/kona og einn strákur/karl vera í sérhverri sveit mótsins.





Meina, erum við ekki að stefna á jafnrétti?

[olof magnusson (IP-tala skráð) 6.4.2008 kl. 23:53]

Með því yfirhöfuð að hafa kvenna- og karlaflokk í skák er verið að gera því skóna að konur séu ekki vitsmunaverur á við karlmenn.

Og með þessari tillögu er í raun verið að leggja til að í það minnsta ein slík "annars flokks vitsmunavera" skuli fá að vera með, út af einhverju sem einhverjir kalla jafnrétti: að skákmaður með kannski 1300 stig skuli tekinn fram yfir annan með 2300 stig!

Vissulega mætti kalla slíkt jöfnuð, þvingaðan jöfnuð, en þetta, að sá sem unnið hefur fyrir 2300 stigum verði að víkja fyrir 1300 stiga skákmanni, gengur augljóslega gegn jafnrétti. 

Auk þess mætti fara í kringum þetta með kynskiptiaðgerðum. Spurningin að vísu á hvaða stigi kynskiptiaðgerðar 2300 stiga skákmaður mætti njóta jafnréttis. Strax við fyrstu hormónagjöf, eða ekki fyrr en tyllinn væri horfinn?

Gott hjá þér Arnar!