Aðalfundur SÍ

Aðalfundur SÍ verður haldinn 3. maí nk.   Hér má nálgast upplýsingar um aðalfundarboð, bréf frá forseta SÍ og hluta lagabreytingartillagna.

Fundarboðið:

Stjórn Skáksambands Íslands boðar hér með til aðalfundar Skáksambandsins í samræmi við 8. gr. laga S.Í.

Fundurinn verður haldinn laugardaginn 3. maí nk. kl. 10.00 fyrir hádegi í Faxafeni 12, Reykjavík.

Dagskrá:  Venjuleg aðalfundarstörf.

Stjórn Skáksambandsins sendir ennfremur með fundarboðinu gögn varðandi skrá yfir fullgilda félagsmenn aðildarfélaga S.Í.  Stjórnir aðildarfélaganna eru vinsamlegast beðnar að útfylla skrár þessar vandlega og senda þær Skáksambandi Íslands í pósth. 8354, 128 Reykjavík eða á netfang [e-mail] fyrir 19. apríl 2008. 

Bréf þetta er sent ásamt gögnum í samræmi við 9. gr. laga S.Í., en sú grein hljóðar svo:

Við atkvæðagreiðslu á aðalfundi á hvert félag eitt atkvæði enda hafi það tveim vikum fyrir aðalfund sent félagaskrá með nöfnum a.m.k. 10 félagsmanna til athugunar fyrir kjörbréfanefnd.  Hafi kjörbréfanefnd ekki borist félagaskrá frá félagi fær það ekki atkvæðisrétt skv. 1.mgr.  Eitt atkvæði bætist við hjá félagi fyrir hverja sveit sem það sendir í Íslandsmót skákfélaga það árið.  Við atkvæðagreiðslu um kjörbréf í upphafi fundar skal gilda sú regla, að hvert félag fari ekki með fleiri atkvæði en það hafði á aðalfundi árið áður.  Enginn fulltrúi getur farið með meira en eitt atkvæði á fundinum.  Við atkvæðagreiðslur á aðalfundi ræður einfaldur meirihluti atkvæða, nema um þau mál sem sérstaklega eru tilgreind í þessum lögum.

Einnig skal bent á 6. grein:

Standi aðildarfélag í gjaldfallinni skuld við sambandið hefur það ekki rétt til að eiga fulltrúa á aðalfundi.  Skákdeildir í félögum geta átt aðild að sambandinu, enda hafi þá minnst 10 menn bundist slíkum samtökum.  Heimilt er tveimur eða fleiri aðildarfélögum í sama landshluta að stofna með sér svæðissamband.

Taflfélögunum gefst kostur á að birta stutta skýrslu um starfsemi sína á síðasta starfsári í árrsskýrslu Skáksambands Íslands.  Hafi félögin áhuga á þessu þarf efni að hafa borist skrifstofu S.Í. í síðasta lagi 19. apríl nk.

Bréf frá forseta SÍ:

Til formanna aðildarfélaga Skáksambands Íslands

Ágæti formaður. 

Þann 3. maí nk. mun ég láta af embætti sem forseti Skáksambands Íslands, en þann dag verður aðalfundur sambandsins haldinn í Skákhöllinni Faxafeni 12 og hefst kl. 10.

Með bréfi þessu langar mig til að hvetja þig og fulltrúa þíns félags til að mæta á aðalfund og taka þátt í að móta stefnu nýrrar stjórnar og vera með í ákvarðanaferli um þau stóru mál sem skákhreyfingin og Skáksambandið stendur frammi fyrir. Það er afar mikilvægt að sem flestir taki nú þátt í umræðum og ákvörðunum um hvert eigi að stefna.

Mig langar einnig til að hvetja þig og ykkur til þess að senda okkur yfirlit yfir starfsemi félagsins á síðasta ári, sem hægt er að nýta bæði í ársskýrslu sambandsins og komandi ársrit. Það kemur bæði félaginu og skákhreyfingunni til góða að halda grunnupplýsingum og annálum til haga. Slíkt yfirlit yfir starfsemi félagsins þarf alls ekki að vera langt - örstutt samantekt er nóg, eins og hjálagt eyðublað gefur til kynna.

Hjálagðar eru þær lagabreytingatillögur sem borist hafa vegna aðalfundar, sumar í nafni stjórnar S.Í. en aðrar í nafni einstaklinga. Einnig er vakin athygli á eyðublöðum sem fylla þarf út og senda fyrir 19. apríl nk. ef félagið ætlar að hafa atkvæðisrétt á aðalfundinum.

Til fróðleiks sendum við líka nokkur eintök af tímariti sem gefið var út í tilefni af Alþjóðlegri skákhátíð í Reykjavík dagana 3. - 12. mars sl., en hátíðin var tilteinkuð minningu Bobbys Fischer.

Ég vona að þið sjáið ykkur fært að mæta á fundinn og hlakka til að sjá ykkur. 

Með góðri kveðju, 

Guðfríður Lilja Grétarsdóttir

Lagabreytingartillögur frá Stjórn SÍ: 

 

Lagabreytingartillögur

lagðar fram af stjórn S.Í. fyrir aðalfund 3. maí 2008

 

Skáklög SÍ

 

14. gr., 2. mgr:

"Við val á keppendum og skipan í landsliðssæti skal stjórnin hafa til hliðsjónar alþjóðleg skákstig og árangur skákmanna á nýafstöðnum mótun, enda hafi þeir teflt eigi færri en 30 kappskákir á undanförnum 24 mánuðum... Stjórn S.Í. getur falið sérstakri nefnd eða þjálfara að gera tillögu til hennar um skipan landsliðs."

 

Breytingartillaga:

„.....eigi færri en 40 kappskákir á undanförnum 24 mánuðum...."

 

Í lok 14. gr. bætist einnig við eftirfarandi klausa: „Stjórn S.Í. skal tryggja að skákmenn sem tefla fyrir Íslands hönd í einstaklings- eða liðakeppni og eru sendir á slík mót á vegum S.Í. fái viðeigandi þjálfun hjá færum þjálfara eða þjálfurum."

 

Greinargerð:

Það hlýtur að teljast mikilvægt að landsliðsmenn Íslands í skák séu í góðri æfingu. Það ætti varla að vera of mikið að gera kröfu um að virkir skákmenn (landsliðsmenn) tefli á 2-3 skákmótum á hverju ári, eða í það minnsta 20 kappskákir á ári. Ástæða er jafnvel til að hækka þetta upp í 25-30 skákir á ári, en etv. er eðlilegt að hækka þetta í þrepum og því er einungis gerð tillaga um hækkun í 40 skákir alls að þessu sinni. Í framhaldi af þeim hluta greinarinnar sem gerð er tillaga að breyta er opið undantekningarákvæði sem ætti að duga fyrir sérstök tilvik. 

 

Hvað síðari klausuna varðar er um að ræða skýr skilaboð sem eiga að tryggja að landsliðsmenn í skák sem tefla fyrir Íslands hönd á mótum sem Skáksamband Íslands sendir þau á fái góða þjálfun fyrir keppni, og þar með sé stuðlað enn frekar að góðum árangri og metnaðarfullum vinnubrögðum fyrir stórmót.

 

 

20. gr.:

"Stjórn Skáksambandsins skal árlega skipa sérstaka mótsstjórn, sem sér um framkvæmd mótsins og sker úr um lögmæti keppenda. Taki ólöglegur keppandi þátt í keppninni skal mótsstjórn án kröfu draga einn vinning frá liði hans. Úrskurðurinn skal falla innan tveggja sólarhringa frá upphafi þeirrar umferðar, sem keppandinn tók þátt í. Úrskurði mótsstjórnar er hægt að skjóta til Dómstóls S.Í. svo og einnig ef mótsstjórn hefur látið undir höfuð leggjast að draga vinning frá liði keppandans. Slík erindi eiga að hafa borist dómstólnum eigi síðar en fjórum sólarhringum frá upphafi þeirrar umferðar sem keppandinn var á meðal þátttakenda. Dómur dómstóls S.Í. skal liggja fyrir eigi síðar en 5 sólarhringum eftir að erindið barst. Skákstjóri úrskurðar um önnur vafaatriði."

 

Breytingartillaga: 

Stjórn Skáksambandsins skal árlega skipa sérstaka mótsstjórn sem sker úr um lögmæti keppenda ef beiðni um athugun á lögmæti viðkomandi liggur fyrir eða ef kæra berst mótsstjórninni. Beiðni um athugun og/eða kæra skal berast mótsstjórn, eða skákstjórum fyrir hennar hönd, áður en keppni lýkur í þeirri umferð sem ólöglegur keppandi telst hafa teflt í. Úrskurður skal liggja fyrir áður en næsta umferð mótsins hefst. Ef keppandi er úrskurðaður ólöglegur er dreginn einn vinningur frá liði hans fyrir hverja viðureign sem hann tekur þátt í. Úrskurði mótsstjórnar má skjóta til Dómstóls SÍ og skulu slík erindi hafa verið send Dómstólnum innan þriggja sólarhringa frá upphafi þeirrar umferðar, sem keppandinn var á meðal þátttakenda. Dómur Dómstóls S.Í. skal liggja fyrir eigi síðar en 5 sólarhringum eftir að erindið barst. Skákstjóri úrskurðar um önnur vafaatriði.

 

Greinargerð:

Mótsstjórn hefur í reynd ekki haft annað verkefni en að taka fyrir lögmæti keppenda þannig að gerð er tillaga um að fella niður "sér um framkvæmd mótsins", enda er það iðulega á könnu stjórnar S.Í.. Það er í reynd óvinnandi vegur að ætla mótsstjórninni að fara yfir nöfn allra keppenda í hverri umferð til að kanna lögmæti þeirra, en slíkt þyrfti að gera ef umrædd lagagrein ætti að fullu að ná tilgangi sínum. Þess vegna er lagt til að mótsstjórnin skoði málið einungis ef sérstök beiðni berst um slíkt fyrir tiltekinn keppanda eða ef kæra berst. Það kann að vera álitamál hvort gefa eigi lengri frest til að koma með kæru og einnig fyrir mótsstjórnina til að úrskurða, en þessi mál eru þess eðlis að nauðsynlegt er að þau fái skjóta meðferð og niðurstöðu.