Fimm íslenskar stúlkur tefla í Stokkhólmi

Allar íslensku stúlkurnar fimm töpuðu í fyrstu umferð Scandinavian Ladies Open sem hófst í Stokkhólmi í dag.   Tvær umferðir verða tefldar á morgun.  

Þátt taka Hallgerður Helga Þorsteinsdóttir (1867), Elsa María Kristínardóttir (1721), Tinna Kristín Finnbogadóttir (1658), Jóhanna Björg Jóhannsdóttir (1617) og Sigríður Björg Helgadóttir (1606).  

Um er að ræða eitt stærsta kvennamót ársins, sem fram fer 20.-25. mars.  Þátt taka 126 skákkonur og þar af er einn stórmeistari og 34 stórmeistarar kvenna.  Íslensku skákkonurnar eru meðal þeirra stigalægstu en þær eru á bilinu 101-106 í stigaröðinni.  Alls eru tefldar níu umferðir.

• Heimasíða mótsins
• Chess-Results

Athugasemdir

[Helgi Árnason (IP-tala skráð) 21.3.2008 kl. 10:26]

Það hlýtur að þurfa töluvert hugrekki hjá þessum ungu íslensku skákkonum að ráðast á þennan garð sem Ladies open er. Skákmótið er firnasterkt. Mótshaldarar leggja mikinn metnað í það að ná heimsmeti í Guinness heimsmetabókina um að mótið sé það fjölmennasta ELO kvennaskákmót sem haldið hefur verið fyrr og síðar. Háar peningaupphæðir og um 30 verðlaun verða veitt sigurvegurum á mótinu og því ekki skrítið að skákdrottningar frá löndum Austur Evrópu streymi á mótið í flokkum. Umgjörð mótsins er öll hin besta. Gist og teflt er á Täby Park hótelinu sem hentar einkar vel til mótahalds með sínum fjögurra stjörnu herbergjum og fjölmörgu stóru sölum sem rúma skákmótið, veislur og uppákomur. Í fyrstu umferð lentu íslensku stúlkurnar í klóm rússneskra, úkraínskra og pólskra "skákbirna" sem sýndu þeim enga miskunn. Nú er verið að tefla 2. umferð og eru andstæðingar íslensku stúlknanna ekki mikið síðri en í 1. umferð ef aðeins er horft til skákstiga. Það vill þannig til að þær sitja allar hlið við hlið í borðaröðun 2. umferðar.

Það var vel gert hjá stjórn Skáksambands Íslands að senda Omar Salama með stelpunum þeim til halds og trausts við skákborðið. Omar er alltaf í góðu skapi og uppörvandi. Vinnudagur Omars er langur því hann býðst til að aðstoða stúlkurnar við undirbúning og yfrirferð frá kl. 7:30 á morgnana og fram til kl. 11:00 á kvöldin. Sem fylgdarmaður og áhorfandi er þetta ánægjan ein að fylgjast með þessum einstaka viðburði á sviði kvennaskáklistar þar sem bæði frábærar skákkonur eru samankomnar og ábyggilega sett heimsmet í glæsileik og fegurð þátttakenda miðað við öll önnur skákmót sem haldin hefa verið. Um það erum við Omar sammála.