Reykjavík Blitz fer fram á morgun - skráning hefst kl. 9 í fyrramálið - fyrstir koma, fyrstir fá!

Lokahnykkurinn á Alþjóðlegu skákhátíðinni sem hefur staðið yfir síðustu 10 daga verður á morgun miðvikudag 12. mars en þá hefst Reykjavík Blitz. Keppt verður klukkan 16 í Ráðhúsi Reykjavíkur og setjast 128 manns að tafli. Teflt er með útsláttarfyrirkomulagi, 5 mínútna skákir Hver keppandi teflir tvær skákir við sama andstæðinginn og sá sem vinnur einvígið kemst áfram, hinn dettur út. Ef jafnt er eftir 2 skákir er tefldur bráðabani. Sá sem vinnur hlutkesti fær að velja hvorn lit hann hefur. Hvítur fær 6 mínútur og svartur 5 mínútur, en svörtum nægir jafntefli til að teljast sigurvegari.
 
Verðlaun eru sem hér segir:
1) 2.500 USD
2) 1.200 USD
3 - 4) 800 USD
5 - 8) 350 USD
 
Öllum er velkomið að skrá sig svo lengi sem pláss leyfir. Skráning hefst á heimasíðu Hellis (af tæknilegum ástæðum þar sem heimasíða SÍ bíður ekki upp á slíkt skráningarform) að morgni miðvikudags kl. 9 og stendur til kl. 14.00, og verður þá lokað. Fyrstur kemur, fyrstur fær. Endanlegur keppendalisti fyrstu umferðar verður birtur á heimasíðu SÍ og á skak.is kl. 15.00.