Skákstjórinn sigraði á afmælisskákmóti Vinjar

Vin, varð 15 ára fyrr í febrúar og af því tilefni var haldið skákmót í húsnæði Vinjar að Hverfisgötu 47. Eftir miklar eldglæringar á skákborðinu, náði skákstjórinn Róbert Harðarson að sigra með fullu húsi vinninga, aðeins vinningi á eftir sigurvegaranum kom svo Pétur Atli Lárusson, og aldursforsetinn, kominn vel á nírætt, Árni Jóhannsson hafnaði í þriðja sæti.

Aðrir keppendur voru Aðalsteinn Thorarensen, Haukur Halldórsson og Guðmundur V. Guðmundsson. Óvenju fámennt var að þessu sinni, og verður flensunni, sem herjar á landsmenn, kennt um.

Glæsilegir vinningar voru í boði Pennans, og ekki má gleyma hinu glæsilega kaffihlaðborði, sem er í lokin á hverju skákmóti Vinjar. Þórdís yfirmaður Vinjar, var verndari mótsins.

Athugasemdir

[Skák.is, 18.2.2008 kl. 20:17]

Eins og allir vita geta skákstjórar verið góðir skákmenn!  Undirritaður minnist þess einu sinni að hafa tekið þátt á Íslandsmótinu í hraðskák jafnframt því að vera skákstjóri.  Í fyrstu umferð mætti ég Stuart Conquest og vann karlinn frekar auðveldlega.

Skömmu síðar heyri ég Conquest segja við einhvern:  "I lost for the arbiter" eins og þar væri mikil skömm.

En hann átti ekki breik enda var ég "hrokin í stöð" og hana nú!

Kveðja,
Gunnar