Fimm sigrar og fimm töp í fyrstu umferð

Guðmundur Kjartansson og Atli Freyr Kristjánsson, sem tefla í a-flokki, Sverrir Þorgeirsson og Daði Ómarsson, sem tefla í b-flokki og Dagur Andri Friðgeirsson, sem teflir í e-flokki unnu sínar skákir í fyrstu umferð.   Aðrir töpuðu.  Önnur umferð er nú í gangi.  Hér að neðan má sjá pistil frá Davíð Ólafssyni liðsstjóra strákanna:

 

 

Úrslit íslensku keppendanna:

• Rasmus Lund Pedersen, Danmörk (1800) - Guðmundur Kjartansson (2307) 0-1
• Atli Freyr Kristjánsson (2019) - Teemu Pudas, Finnland (2202) 1-0
• Sverrir Þorgeirsson (2120) - Timmy Forsberg Svíþjóð (2068) 1-0
• Aleksi Wallin, Finnland (2013) - Daði Ómarsson 0-1
• Jonathan Westerberg, Svíþjóð (1791) - Patrekur Maron Magnússon (1785) 1-0
• Svanberg Már Pálsson (1820) - Vihtori Immonen, Finnland (1752) 0-1
• Einar Gregersen, Færeyjum (1192) - Dagur Andri Friðgeirsson (1798) 0-1
• Erik Rönka, Finland (1702) - Friðrik Þjálfi Stefánsson (1455) 1-0
• Egor Norlin, Svíþjóð (1472) - Kristófer Gautason (1245) 1-0
• Högni Egilstoft Nielsen, Færeyjum (1382) - Dagur Ragnarsson (0) 1-0

Fyrsta umferðin var tefld í morgun.  Í A-flokki vann Guðmundur og Atli Freyr báðir sannfærandi sigur.  Í B-flokki vann Sverrir mjög örugglega í skákskólavaríantinum með hvítu og sigurinn hjá Daða var skólabókadæmi um það hvernig á að vinna andstæðing sem kann alla teoríuna en er ekki alveg með áætlunina á hreinu eftir það!  Í C-flokki lenti Patrekur í stöðu sem hann þekkti ekki vel og tapaði eftir að hafa fest riddara úti á kanti.  Svanberg fékk vænlega stöðu en varð full ákafur og fórnaði manni sem ekki stóðst og tapaði því.  Í D-flokki vann Dagur Andri mjög sannfærandi sigur þar sem hann hafði frumkvæðið nánast allan tíman með svörtu!  Friðrik Þjálfi tapaði hins vegar í baráttuskák þar sem slæmur fingurbrjótur sem kostaði peð réð úrslitum.  Í E-flokki tapaði Dagur Ragnarsson fyrir sannfærandi taflmennsku andstæðingsins auk þess sem spennuálag fyrstu skákar hans í útlöndum hafði sitt að segja.  Kristófer tapaði baráttuskák, þar sem andstæðingurinn fléttaði af honum peð sem fékk það mikið á Kristófer að hann lék af sér drottningunni um leið.

Annars er stemmingin hjá okkur fín - sérstaklega eftir öruggan sigur í ratleiknum í gær, þar sem yngstu strákarnir fóru á kostum í myndastyttugjörningi og sýslumaðurinn við að byggja háan turn úr spaghetti og tyggjói!

Í annarri umferð eru þrír strákanna í beinni útsendingu á netinu!

• Heimasíða mótsins