Palla Jóns mótið í Vin

Þegar áhugasamir skákmenn ætluðu að taka nokkrar bröndóttar sér til skemmtunar á skákæfingu í Vin, athvarfi Rauða krossins fyrir fólk með geðraskanir, hafði góður gestur komið norðan heiða, skákáhugamaðurinn Páll Jónsson, sem lengi hefur heimsótt athvarfið á Akureyri, Laut.

Sett var upp hraðskákmót piltinum til heiðurs, umsvifalaust, undir forystu Róberts Harðarsonar, verðandi stórmeistara. 6 manns tóku þátt og eins og gengur töpuðust unnar skákir á tímafalli, þrátt fyrir heilar sjö mínútur í umhugsunartíma, og eitthvað varð um óvænt úrslit.

Róbert tefldi sem gestur, enda töluvert stigahærri en næstu menn og  hokinn af reynslu hafði hann sigur í öllum skákum sínum en í fyrsta sæti varð:

Rafn Jónsson með 3 vinninga. Í öðru sæti kom Páll Jónsson sjálfur með tvo eins og Guðmundur Valdimar Guðmundsson sem hafði tvo einnig en náði bronsinu.

Að sjálfsögðu var kaffi og ávaxtahlaðborð eftir mót svo allir voru glaðir að lokum.

Í Vin, Hverfisgötu 47, er teflt á mánudögum klukkan 13:00 og mót eru haldin annað veifið. Skákfélag Vinjar og Hrókurinn hafa verið í góðu samstarfi undanfarin fjögur ár. Allir er velkomnir að kíkja við.