HM unglinga; Dagur og Guðmundur gerðu jafntefli

FIDE-meistararnir Dagur Arngrímsson (2323) og Guðmundur Kjartansson (2324) gerðu báðir jafntefli í 5. umferð Heimsmeistaramóts unglinga, 20 ára og yngri, sem fram fór í dag í Yerevan í Armeníu.   Dagur gerði jafntefli við hollenska alþjóðlega meistarann Daan Brandeburg (2483) en Guðmundur við Armenann Ovik Hayrapetian (2374).  Dagur hefur 2,5 vinning og er í 37.-45. sæti en Guðmundur hefur 1,5 vinning og er í 65.-73. sæti.  Filippseyski alþjóðlegi meistarinn Wesley So (2531) er efstur með 4,5 vinning.  

Í sjöttu umferð, sem fram fer á morgun, teflir Dagur við georgíska alþjóðlega meistarann Giorgi Margvelashvili (2451) en Guðmundur við Indverjann Karthik Arun (2391). 

Alls taka 76 skákmenn þátt í mótinu.  Þar af eru 15 stórmeistarar, 22 alþjóðlegir meistarar og 8 FIDE-meistarar.  Guðmundur og Dagur eru númer 58 og 59 í stigaröðinni fyrir mót.

 

• Heimasíða mótsins
• Chess-Results

Athugasemdir

[Torfi Stefánsson (IP-tala skráð) 7.10.2007 kl. 18:32]

Eins og menn hafa verið að benda á á Skákhorninu þá er HM-mótið ungmenna 2007 geysisterkt. Má sem dæmi nefna að Norðurlandameistarinn í skólaskák Svíinn Nithander er enn aðeins með hálfan vinning og meðal allra neðstu manna. Guðmundur Kjartansson var í sömu stöðu eftir 3 umferðir en hefur nú bætt stöðu sína nokkuð. 

Mikil umræða hefur verið á Skákhorninu í gærkvöldi og í dag um ástæðuna fyrir lokun á mig á Skákhorninu. Fullyrða menn sem reyna að réttlæta þá ákvörðun að ástæðan hafi verið sú að ég hafi verið að "níða skóinn af unglingunum okkar", gera ítrekað lítið úr árangri þeirra og draga upp dökka mynd af getu þeirra.

Nú er það svo að þegar menn þurfa að verja slæman málstað grípa þeir til lýginnar og er svo einnig í þessu tilfelli.

Ég hef í skrifum mínum alls ekki gert lítið úr unglingunum persónulega heldur einungis bent almennt á  að staða þessara mála sé ekki nægilega góð. Íslensk ungmenni hafi mörg undanfarin ár verið að dragast aftur úr á skáksviðinu og því þurfi að grípa til einhverra ráðstafana til að snúa blaðinu við.

Þessi málefnalega umræða hefur einhverra hluta vegna farið fyrir brjóstið á ýmsum áhrifamönnum í skákhreyfingunni og leitt til ritskoðunar á vettvangi skákáhugamanna, Skákhorninu.

Að baki virðist liggja tilraun manna sem koma að skákþjálfun og ákvarðanatöku á þessu sviði til að  draga úr gagnrýninni umræðu um stöðu mála og um frammistöðu þeirra sjálfra.

Slík tilraun dæmir sig auðvitað sjálf eða hvað ætli knattspyrnu- eða handknattleysáhugamönnum fyndist um það ef íþróttafréttamenn og áhugafólk mætti ekki ræða um árangur landsliða okkar í yngri flokkunum?

Það er kominn tími til að skákheyfingin hætti að stunda ritskoðun þegar fjallað er um óþægileg atriði og taki heldur á vandamálunum af myndarskap.

Upp kemst um Potemkin tjöldin fyrr eða seinna.