GAMMA Reykjavíkurskákmótið komið af stað!

Hið árlega GAMMA Reykjavíkurskákmót hófst í dag þegar 1. umferð var sett af Líf Magneudóttur. Mótið í ár telur 248 keppendur frá 34 þjóðlöndum en 27 stórmeistarar eru mættir til leiks.

93 keppendur eru frá Íslandi sem eru skiljanlega í meirihluta en næstflestir keppendur koma frá Bandaríkjunum 23 talsins.

Sem endranær er nokkur styrkleikamunur í 1. umferð en að þessu sinni var þó boðið upp á annað pörunarkerfi, svokallað Accelerated Swiss-system sem þýðir að sterkari keppendur mætast fyrr í mótinu þar sem því er styrkleikaskipt.

Þrátt fyrir það var mjög lítið um óvænt úrslit og einu óvæntu úrslitin á efri borðunum voru þétt jafntefli hjá Kristjáni Eðvarðssyni gegn Sergey Grigoriants (2568). Dagur Ragnarsson náði einnig góðu jafntefli gegn Konstantinn Landa (2613) og Baldur Teódór Pálsson náði góðum sigri á Maríu Brunello (2367)

Stigahæstir keppenda eru þeir Richard Rapport (2715) og Pavel Eljanov (2713). Mótið heldur áfram á morgun með tvöfaldri umferð. Fyrri umferðin hefst klukkan 09:00 og seinni umferðin klukkan 17:00.

 

Heimasíða mótsins

Úrslit á Chess-Results

Beinar útsendingar með skýringum GM Simon Williams og WIM Fional Steil-Antoni