Guðmundur tapaði í lokaumferðinni

Alþjóðlegi meistarinn Guðmundur Kjartansson (2468) tapaði afar slysalega í lokaumferðinni í Hasting gegn indverska alþjóðlega meistaranum Arghyadip Das (2399) þegar hann lék sig í mát með unnið tafl. Guðmundur endaði með 5,5 vinninga. Indverski stórmeistarinn Deep Sengupta (2575) sigraði á mótinu en indverskir stórmeistarar eru að gera það mjög gott þessi misserin.

Sá sem stal senunni var hins vegar indverska undrabarnið R. Praggnanandhaa (2452) sem er aðeins 11 ára og yngsti alþjóðlegi meistari heims. Sá hlaut 6,5 vinninga og var í skiptu öðru sæti. Hann verður meðal keppenda á GAMMA Reykjavíkurskákmótinu í apríl nk. en kappinn sá er talinn hafa möguleika á að vera yngsti stórmeistari allra tíma og slá met Sergey Karjakin. Hann vann danska stórmeistarann Allan Stig Rasmussen (2502) í lokaumferðinni á laglegan hátt og var taplaus á mótinu. 

Alls tóku 97 skákmenn þátt í efsta flokknum og þar af voru 11 stórmeistarar.

• Heimasíða mótsins
• Chess-Results
• Beinar útsendingar - hefjast kl. 14:15.