Skáklíf á Hvammstanga

Grunnskóli vestur Húnavatnssýslu á Hvammstanga tekur þátt í verkefni Skáksambandsins Skák eflir skóla - Kennari verður skákkennari. Í síðustu viku fór Stefán Bergsson verkefnisstjóri í sína aðra heimsókn í skólann í vetur. Kennsla er í þriðja og fjórða bekk. Kennslan hefur gengið vel að mati Þorbjörns Gíslasonar skákkennara við skólann sem er fulltrúi skólans í verkefninu. Kvöldið fyrir kennsluna tefldu bæði Stefán og Þorbjörn á Hausthraðskákmóti ungmennafélagsins Kormáks. Á því móti tefldu ellefu keppendur og þar á meðal sveitarstjórinn hún Guðný Hrund Karlsdóttir sem tefldi eitt sinn einvígi um Íslandsmeistaratitil kvenna. Stefán hafði sigur á mótinu en í öðru sæti varð Daníel Sigurðsson sem er sonur hins mikla sóknarskákmanns Sigurðar Daníelssonar. Skákstjóri á mótinu var Magnús Vignir Eðvaldsson sem er íþróttakennari skólans. Teflt var við afar góðar aðstæður á hinum glæsilega veitingarstað Sjávarborg.

Nokkuð skáklíf er í sveitarfélaginu og hittast menn annað veifið og tefla en Skákfélag Hvammstanga var eitt af stofnfélögum Skáksambandsins árið 1925.