Huginn og TR mætast í úrslitum

Það voru kampakátir skákmenn sem mættu til leiks í Faxafenið í fyrradagskvöld skömmu eftir landsleik Íslands og Finnlands. Ástæðan fyrir mætingunni voru undanúrslit Hraðskákeppni taflfélaga. Annars vegar mættust a-sveit Hugins og Skákfélags Akureyrar og hins vegar b-sveit Hugins og Taflfélag Reykjavíkur. Svo fór að báðar viðureignirnar unnust með umtalsverðum yfirburðum. Lokatölur urðu nánast þær sömu en TR vann b-sveit Hugins 52,5-19,5 og a-sveit Hugins lagði Akureyringa að velli 52-20.

Það verða því Huginn og TR sem mætast í úrslitum sem fram fara 15. október nk.

Huginn-SA

Magnús Örn Úlfarsson og Ingvar Þór Jóhannesson hlutu festa vinninga Huginsmanna eða 9 vinninga í 12 skákum. Hannes Hlífar Stefánsson hlaut 8,5 vinninga í 11 skákum. Hjörvar Steinn Grétarsson tefldi aðeins í fyrri hálfleik og vann allar sex skákir sínar. Helgi Ólafsson tók seinni hálfleik og hlaut 5,5 vinninga. 

Stjörnulögfræðingurinn, Halldór Brynjar Halldórsson fór fyrir sínum mönnum í liði Akureyringar og fékk 6 vinninga í 12 skákum. Mikael Jóhann Karlsson hlaut 4,5 vinning.

Einstaklingsúrslit má nálgast á Chess-Results. 

TR-Huginn-b

Bragi Þorfinnsson var bestur TR-inga með 11 vinninga í 12 skákum. Guðmundur Kjartansson hlaut 10,5 vinninga og Jón Viktor Gunnarsson 9,5 vinninga. 

Ásgeir Ásbjörnsson fór fyrir sínum mönnum í Hugin-b og hlaut 7 vinninga í 12 skákum. Kristján Eðvarðsson hlaut 5 vinninga en þeir tveir stóðu sig langbest sveitarmeðlima.

Einstaklingsúrslit má nálgast á Chess-Results.

Úrslitaviðureignin fer eins og áður sagði fram 15. október nk. Nánari tímasetning né staðsetning liggja ekki fyrir.