Undanúrslit hraðskákkeppni taflfélaga fer fram í kvöld - margir sterkustu skákmenn landsins að tafli

Undanúrslitin í Hraðskákkppni taflfélaga fara fram í kvöld í húsakynnum TR í Faxafeni. Viðureignin hefst fljótlega eftir landsleik Íslands og Finnlands eða kl. 21.00. Áhorfendur eru velkomnir. Taflfélag Reykjavikur og b-sveit Hugins leiða saman hesta sína en í hinni viðureigninni eigast við a-sveit Hugins og Skákfélag Akureyrar. Búast má við harðri baráttu enda margir af fremstu skákmönnun landins í liðunum.

Meðal keppenda í kvöld má nefna stórmeistarana Hjörvar Stein Grétarsson, stigahæsta hraðskákmann landsins, Helga Ólafsson, Helga Áss Grétarsson og Hannes Hlífar Stefánsson. Allir eru þeir liðsmenn Hugins.

Innan vébanda Taflfélags Reykjavíkur eru meðal annarra alþjóðlegu meistararnir og hraðskákssnillingarnir Björn og Bragi Þorfinnssynir, Arnar E. Gunnarsson, Jón Viktor Gunnarsson og Guðmundur Kjartansson.

Ekki má vanmeta Akureyringa sem hafa meðal sinna raða hinn eitursterka skákmeistara Stefán Bergsson, FIDE-meistarann Björn Ívar Karlsson og síðast en ekki síst hin þrautreynda Áskel Örn Kárasson.