ÓL í Bakú: Sárgrætileg endalok - Bandaríkin og Kína Ólympíumeistarar

Það er alþekkt að síðasta umferð Ólympíumóta í skák er sú mikilvægasta enda ræður hún því oft hvort að mótið í heild sinni teljist gott eða slæmt. Íslenska landsliðið í opnum flokki fékk erfiða andstæðinga í síðustu umferð. Sterkt landslið Argentínumanna beið okkar manna og ljóst var að barist yrði á banaspjótum. 

 Íslenska liðið varð snemma fyrir áfalli  þegar staða Hjörvars Steins féll eins og  spilaborg gegn stórmeistaranum Mareco.  Leiðinlegur endir á frábæru móti hjá  Hjörvari. Á sama tíma voru stöður Hannesar  Hlífars Stefánssonar og Guðmundar  Kjartanssonar að leysast upp í jafntefli.  Jóhann Hjartarson tefldi af krafti á  3.borði gegn stórmeistaranum Perez Ponsa.  Sá argentínski var í nauðvörn en á hreint  ótrúlegan hátt náði hann að fórna nánast  öllu liðinu sínu til þess að þvinga fram  óstöðvandi þráskák. Þar með tryggði hann  Argentínumönnum sigur með minnsta mun, 2,5  - 1,5. 

Íslenska liðið féll langt niður töfluna við þessi úrslit og endaði mótið í 60.sæti af 180 þjóðum. Liðið var aldrei neðar í mótinu en eftir síðustu umferð sem er sárgrætilegt.

Íslenska kvennaliðið mætti ofjörlum sínum í liði Grikklands. Lenka Ptacnikova, sem staðið hafði sig frábærlega á 1.borði, tapaði eftir snarpa baráttu. Guðlaug Þorsteinsdóttir varð sömuleiðis að lúta í gras á öðru borði en góðu fréttirnar voru  frábær barátta Hallgerðar Helgu  Þorsteinsdóttur og Hrundar Hauksdóttur sem  björguðu jafntefli í sínum skákum gegn mun  stigahærri andstæðingnum. 

 Íslenska liðið endaði í 78.sæti af  140.þjóðum. 

 Bandaríkjamenn unnu sögulegan sigur í opnum  flokki en þetta er í fyrsta skipti síðan  1976 sem að þeir standa uppi sem  sigurvegarar. Liðið varð jafnt  Úkraínumönnum að vinningum en hafði  sigurinn því að sameiginlegur  vinningafjöldi andstæðinga þeirra var  hærri. Rússar náðu með herkjum að landa  bronsverðlaunum og eru eflaust hundfúlir með árangurinn.

 

Kínverjar unnu sigur á Rússum í úrslitaviðureigninni í kvennaflokki og sendu þar með ríkjandi Ólympíumeistara (og það í þrígang) í 4.sæti mótsins. Pólsku konurnar hrepptu silfur og úkraínska sveitin hlaut brons.

Nánar um úrslitin

 

 

 

Athugasemdir

[Gunnar Th. Gunnarsson, 14.9.2016 kl. 00:46]

Agalegt hjá Hjörvari, ekki oft sem maður sér stórmeistara leika af sér manni á svona einfaldan hátt.

[matthías (IP-tala skráð) 16.9.2016 kl. 23:59]

Sæll Ingvar,

um leið og ég þakka fyrir góðar skýringar og skemmtilega pistla að þá vildi ég spyrja þig hvort þú ætlaðir ekki að klára ólympíumótið og sýna lokaskákirnar? 

skákkveðja

matthías