Ólympíuskákmótið: 6. umferð í kvennaflokki

Ísland 1 ½ - Perú 2 ½

Við mættum liði Perú (meðalstig: 2175) í 6. umferð.

Íslenska kvennalandsliðið fyrir 6. umferð.

Lenka hafði hvítt gegn WGM Cori T. Deysi (2402) á 1. borði. Deysi hefur m.a. teflt á Reykjavik Open ásamt bróður sínum Jorge Cori. Upp kom kóngsindversk vörn sem við höfðum litið vel á fyrir skákina. Staðan eftir byrjunina var í jafnvægi og hélst í raun þannig langt fram eftir miðtaflinu. Mér fannst Lenka standa vel en í raun bauð staðan ekki upp á mikið og kannski mátti hvorugur hreyfa sig mikið. Eftir tímamörkin komu upp töluverðar flækjur og þá þurfti Lenka að gefa skiptamun.

Hér lék Cori 46...Re5! og fékk betra tafl. Hvítur má ekki drepa á e5 vegna 47...Bxe5+ eða 47...Bg5+

Lenka náði samt að halda stöðunni saman og átti góða möguleika á jafntefli í framhaldinu. Í tímahrakinu missti hún af bestu vörninni, lék af sér hrók og neyddist til að gefast upp. Hörku skák sem hefði endað með jafntefli á góðum degi.

Guðlaug hafði svart gegn Vanessa Sanchez Zambrano (1892) á 2. borði. Guðlaug tefldi sjaldgæft afbrigði í slavneskri vörn, sem við höfðum litið á, þar sem hún hirti snemma hvíta peðið á c4 og hékk á því eins lengi og hún gat.

Gulla lék síðast 4...Be6!? til að hanga á peðinu á c4. Hér getur hvítur leikið skákinni af sér með 5. Rg5?? Da5+!

 

Liðsstjórinn grettir sig og vonast eftir 5. Rg5??

Zambrano féll þó ekki í gildruna en tefldi engu að síður alltof passíft, fékk litlar bætur fyrir peðið í framhaldinu og Guðlaug hafði fullt ,,kontról‘‘ á stöðunni. Í framhaldinu náði hún að virkja mennina sína og ýta frípeðunum sínum á drottningarvæng. Zambrano átti engin svör við þessu og sannfærandi sigur Guðlaugar staðreynd í vel útfærðri skák.

Hallgerður Helga hafði hvítt gegn Ann Chumpitaz (2150) á 3. borði. Upp kom ítalskur leikur og Chumpitaz jafnaði taflið snemma. Halla lenti fljótlega í erfiðri vörn en varðist vel, eins og svo oft áður, og náði að stýra skákinni út í endatafl þar sem báðar höfðu tvo riddara og nokkur peð. Chumpitaz fann ekki vænlegustu leiðina í tímahraki og jafntefli varð niðurstaðan eftir harða baráttu. Góð úrslit hjá Höllu sem er að berjast vel í sínum skákum.

Hér lék Halla 74. Re5+! og eftir 74...Kxh7 75. Rxf7 e3 76. Re5 var samið um jafntefli.

Hrund hafði svart gegn Ingrid Aliaga Fernandez (2096) á 4. borði. Upp kom rólegt afbrigði í drottningarpeðsbyrjun, afbrigði sem Arthur Yusupov tefldi stundum í gamla daga. Hrund tefldi samkvæmt réttri hugmynd en við höfðum lagt upp með að hún reyndi að ná frumkvæðinu snemma. Í 11. leik lék Fernandez 11. Hc2!? sem var lúmskur og kom í veg fyrir hugmynd Hrundar að leika 11...Df6.

Fernandez lék síðast 11. Hc2!? og Hrund féll í gildruna með 11...Df6?? Eftir 12. c5 vinnur hvítur mann. Í stað 11...Df6 getur svartur t.d. leikið 11...c5 eða 11...De7 með fínni stöðu.

Niðurstaðan var óverjandi mannstap og ekki einu sinni hægt að ná neinu sprikli, sem Hrund þó reyndi. Svekkjandi tap niðurstaðan. Hrund getur þó lært töluvert af tapinu því eftir leik eins og 11. Hc2 hefði hún getað gert ráð fyrir því að hvítur væri að plana eitthvað vafasamt.

Lokatölur 1½ - 2½ en 2-2 hefðu ekki verið ósanngjörn úrslit á móti þessu sterka liði Perú, miðað við taflmennsku okkar. Á morgun mætum við grjóthörðu liði Spánar (meðalstig: 2335). Ekki góð pörun miðað við stöðuna í mótinu en við höfum verið að tefla vel hingað til og óttumst ekkert. Ekkert!

Þangað til næst, bestu kveðjur frá Bakú.

Björn Ívar