ÓL: Ísland gerði jafntefli við Tyrkland í opnum flokki

Íslenska liðið í opnum flokki Ólympíuskákmótsins í Bakú gerði jafntefli við Tyrkland í sjöttu umferð sem fram fór í dag. Hannes Hlífar Stefánsson, Hjörvar Steinn Grétarsson, Jóhann Hjartarson og Bragi Þorfinnsson gerðu allir jafntefli. Sé litið til þess að Tyrkir eru stigahærri á öllum borðum þá mætti ætla að íslensku landsliðsmennirnir hafi tekið stiginu fagnandi. Hugur landsliðsmanna er hins vegar þannig innréttaður að þeir ætluðu sér sigur í þessari viðureign og ekkert annað. Liðsmenn eru hins vegar ekki að velta sér upp úr því sem hefði getað orðið, enda verður úrslitunum ekki breytt úr þessu. Undirbúningur fyrir viðureign morgundagsins er þegar hafinn og eru landsliðsmenn nýlega komnir aftur á hótelið eftir að hafa haldið liðsfund utandyra í hlýrri kvöldgolunni hér í Bakú.

Íslenska liðið er sem stendur í 13-26.sæti með 9 stig af 12 mögulegum og hefur jafn marga vinninga og stórlið heimamanna, Aserbaísjan. Noregur, með heimsmeistarann Magnus Carlsen innanborðs, hefur einnig 9 stig.

Kvennaliðið íslenska tapað með minnsta mun fyrir Perú, 1,5-2,5. Liðið var hársbreidd frá því að næla í jafntefli sem hefðu verið einkar góð úrslit sé litið til þess að Perú hefur töluvert hærri meðalstig en það íslenska. Guðlaug Þorsteinsdóttir tefldi mjög vel í dag og vann sannfærandi sigur á öðru borði, hennar fyrsta sigurskák til þessa í mótinu. Hallgerður Helga Þorsteinsdóttir gerði jafntefli í mikilli baráttuskák þar sem teflt var til síðasta manns. Lenka Ptacnikova mætti hinni geysisterku Deysi Cori (2402) og var grátlega nærri því að landa jafntefli, en varð að lokum að játa sig sigraða eftir hetjulega baráttu. Hrund Hauksdóttir tapaði sinni skák á fjórða borði eftir slæma yfirsjón snemma tafls.

Í 7.umferð opins flokks mætir Ísland (2527) liði Grikklands (2592). Í kvennaflokki mætir Ísland (2003) liði Spánar (2335). Báðar íslensku sveitirnar tefla því aftur við andstæðinga sem hafa hærri meðalstig. Búast má við að róðurinn verði þungur fyrir kvennaliðið því Spánn er 14.stigahæsta skáksveit mótsins á meðan íslenska sveitin er í 61.sæti.

Indland er í efsta sæti opna flokksins með fullt hús, eða 12 stig. Árangur þeirra til þessa er glæsilegur, ekki síst fyrir þær sakir að Viswanathan Anand (2776), fyrrum heimsmeistari, teflir ekki með liðinu. Bandaríkin hleyptu mikilli spennu í mótið með því að leggja Úkraínu að velli í dag með minnsta mun. Með sigrinum settist lið Bandaríkjanna eitt að öðru sætinu með 11 stig. Í humátt á eftir koma tíu þjóðir með 10 stig, þar á meðal eru Kína, Rússland, Úkraína og andstæðingar okkar Íslands í 2.umferð, Tékkland.

Í kvennaflokki eru tvö lið efst og jöfn eftir innbyrðis jafntefli í dag, Rússland og Úkraína. Viðureign þeirra var þrungin spennu enda hafa þessar hæfileikaríku skákkonur marga hildi háð við skákborðið. Það vakti nokkra athygli að þrír fyrrum heimsmeistarar kvenna sátu að tafli í þessari viðureign. Á 1.borði vann Anna Muzychuk (2550) frá Úkraínu fyrrum heimsmeistarann Alexöndru Kosteniuk (2538) frá Rússlandi. Á 2.borði gerði fyrrum heimsmeistarinn, María Muzychuk (2539) jafntefli gegn hinni rússnesku Valentínu Guninu (2520). Á 4.borði tapaði fyrrum heimsmeistarinn, Anna Ushenina (2457) frá Úkraínu, fyrir hinni rússnesku Olgu Girya (2452).

Viðureignir morgundagsins hefjast klukkan 11 að íslenskum tíma.

• Heimasíða mótsins
• Chess-Results
• Beinar útsendingar