Stephan,Halldór og Svava efst eftir þrjár umferðir

Þrem umferðum er lokið á Sumarsyrpu Skákdeildar Breiðabliks. Undirritaður hélt oft á tíðum að hann væri staddur í Rauða Krossinum í gær þar sem að þátttakendur voru einstaklega gjafmildir á kallana sína í gær. Sveiflurnar voru miklar, og ber þar hæst að nefna skák Halldórs Atla og Stephans Briem í 3 umferð en þar lék Halldór Atli af sér kalli í 8.leik en náði heldur betur að svara fyrir sig með flottri endatafls tækni og sigldi þar hálfum vinning í höfn. Á fjórða borði fór fram Benediktarbardagi þar sem að Þórisson tefldi eins og engill og sigraði örugglega.

Batel hélt áfram að gera flotta hluti í gærmorgun þegar að hún náði jafntefli gegn hinni efnilegu Svövu Þorsteinsdóttur. Keppnisskapið er það mikið í Batel að þegar að það var aðeins eitt peð á báða bóga og mislitir biskupar, þá neitaði Batel jafnteflisboði Svövu. Hins vegar eftir miklar augngotur hjá viðstöddum áttaði hún sig á því að líklega væri um jafntefli að ræða.

Fjórða umferð hófst í morgun og þar mættust á fyrsta borði Stephan og Svava, Halldór Atli mætir hinum efnilega Benedikt Þórissyni. Þess má til gamans geta að teflt er til þrautar ef að fleiri en einn verður efstur og því get ég lofað miklu fjöri í Stúkunni í dag!

Úrslit og stöðu má finna á Chess-Results.

Birkir Karl Sigurðsson.