EM einstaklinga – Pistill nr. 3

Það hefur gengið bærilega hjá íslensku skákmönnunum á EM einstaklinga og allir þeir eru þeir í kringum parið vinningalega séð á mótinu. Sjá nánar á Chess-Results.

Ýmislegt hefur vakið athygli okkar hér í Gjakova í Kósovó. Varðandi mótið þá vekur fjarvera Serba athygli en aðeins einn serbneskur skákmaður teflir. Það vekur einnig athygli hversu fáir Rússar tefla og hef heyrt af því ýjað að Rússarnir hafi ekki beinlínis hvatt sitt fólk til að tefla í Kósovó mögulega vegna vinatengsla við Serba.  Hvort það sé rétt eða ekki veit ég ekki. Enginn Aseri er hér heldur en mér skilst að þar hafi skáksambandið hvatt sína skákmenn til að fara ekki. Armenar fjölmenna hins vegar hingað.

Kósovóbúar eru ákaflega vinalegir og ákaflega þjónustulundaðir. Allt er hér ótrúlega ódýrt. Bjór, gos eða raunvínsglas kostar eina evru á veitingastað og kaffibollinn hálfa evru. Launin eru heldur ekki há en mér skilst að meðallaun hér séu um 300-350 evrur á mánuði.

Mótshaldið er komið í góða rútínu og sér maður ró færast yfir andlit helstu leikendur, mótsstjórann og yfirdómarann, smá saman. Á morgun er svo langþráður frídagur á mótinu.

Í gær fór ég heimsókn með mörgum starfsmönnum mótsins í fjallahéraðið Rugove sem er í 2.000 metra hæð og nærri landamærum Svartfjallalands. Þar var boðið upp á heimagerðan mjög ljúffengan mat og auðvitað boðið upp á eitt Raki-staup með. Á heimleiðinni stóð til að stöðva í Peia þar sem hún Donika Kolica okkar er fædd. Ekki gat ég stöðvað þar, þar sem ég þurfti að flýta heimför vegna erindis frá Skáksambandi Rúmeníu. 

Rúmenska skáksambandið sendi kvörtunarbréf (letter of complaint) til mótsstjórnar og áfrýjunarnefndar vegna afskipta yfirdómarans, Tomek Delega, af skák eins rúmenska keppendans í fyrradag. Bréfið má lesa á Íslenskir skákmenn á Facebook.  Bréfinu var svo lekið á netið sem gerði málið enn verra. Þar var Delega, sem var annar yfirdómara EM landsliða í Reykjavík og ákaflega virtur dómari, sakaður um að hafa hjálpað landa sínum sem tefldi við rúmenskan skákmann.

Áðurnefndur Rúmeni hóstaði mjög mikið á meðan skákin var tefld og hélt ekki fyrir munninn á meðan. Það var til þess að óskað var eftir því að hann væri með grímu fyrir munninum til að trufla síður aðra. Sú ósk var gerð í samráði við móður hans og eftir að tímamörkunum var náð.  Áðurnefndur Rúmeni, sem er aðeins 15 ára og mikið efni, á mjög erfitt með að vera kyrr þegar hann er taugaóstyrkur og getur virkað truflandi á andstæðinginn og jafnvel keppendur á næstu borðum. Ég sé þetta fyrir mér sem mjög  krefjandi verkefni fyrir Skáksamband Rúmeníu að vinna í því að fá strákinn til að vera yfirvegaðri við borðið því annars er hætt við að uppákomur sem þessar geti endurtekið sig.

Áfrýjunarnefnd mótsins, þar sem ég er formaður, tók erindið fyrir. Við ræddum við málsaðila, meðal annars skákstjóra mótsins, móður stráksins, andstæðing hans og fleiri til. Að lokum gáfum við frá okkur stutta yfirlýsingu um málið þar sem studdum skákstjóra mótsins og hans ákvörðun. Vona ég að málinu sé lokið en Delega er engan veginn sáttur við Rúmenana og ásakanir þeirra í sinn garð um hlutdrægni.

Á morgun er frídagur á mótinu. Við Björn Þorfinnsson höfum a.m.k. ákveðið að horfa á úrslitaleik Liverpool og Sevilla í Evrópukeppninni í fótbolta.

Kveðja frá Gjakova,
Gunnar Björnsson