EM einstaklinga: Stórmeistararnir unnu í fjórðu umferð

Stórmeistararnir Hannes Hlífar Stefánsson (2581) og Héðinn Steingrímsson (2574) unnu báðir í fjórðu umferð EM einstaklinga sem fram fór í Gjakova í Kósovó í dag. Hannes vann svissneska FIDE-meistarann Gabriel Gaehwiler (2352) en Héðinn vann Ísraelann Moshe Gal (2173). Guðmundur Kjartansson (2457) og Björn Þorfinnsson (2410) töpuðu hins vegar báðir. Guðmundur fyrir ísraelska stórmeistaranum Tamir Nabaty (2601), sem var sannarlega betri en enginn (nobody), en Bjössi fyrir þýska stórmeistaranum Vitaly Kunin (2595).

Hannes hefur 3 vinninga, Héðinn hefur 2½ vinning, Guðmundur hefur 2 vinninga og Björn hefur 1½ vinning.

Bæði Hannes og Héðinn verða í beinni í fimmtu umferð sem fram fer á morgun. Hannes teflir við pólska stórmeistarann Dariusz Swiercz (2656) en Héðinn við, úkraínska Íslandsvininn brosmilda, Yuriy Kryvoruchko (2691). 

Björn og Guðmundur tefla við minni spámenn frá Kósovó og Albaníu. Björn teflir reyndar við skákkonu sem gæti reyndar þótt ótrúlegt megi virðast vera eina skákkona sem tekur þátt í skákmótinu. Ritstjóri ætlar að kanna betur þá staðreynd á morgun. 

Þrír stórmeistarar eru efstir og jafnir á mótinu. Það eru Radoslaw Wojtaszek (2722), Póllandi, Ernesto Inarkiev (2686), Rússlandi, og hinn eiturhressi Georgíumaður Baadur Jobava (2661).

Umferð morgundagsins hefst kl. 13:45.

• Heimasíða mótsins
• Beinar útsendingar (kl. 13:45)
• Chessbomb (beinar útsendingar)
• Chess-Results