EM einstaklinga: Pistill frá upphafsdegi

EM einstaklinga hófst fyrr í dag. Teflt er þorpinu Gjakova sem er í 90 km. frá Pristina höfuðborg Kósovó. Fjórir Íslendinga taka þátt er það fjölmennasta sendinefndin frá Norðurlöndunum. 

239 keppendur eru skráðir til leiks. Einhverjir mættu ekki til leiks svo sjálfsagt er þeir eitthvað færri sem taka þátt. Kósovóbúar eru langflestir eða 82. Rússar eru 18, Úkraínumenn 15 og Tyrkir 14.  Aðeins einn Serbi tekur þátt en þeir eru afar ósáttir við að Kósovó hafi verið tekið inn í ECU og FIDE og eru auðvitað almennt ósáttir við Kósovó sem viðurkennt land.

Íslensku keppendurnir komu snemma til leiks. Hannes og Gummi komu beint frá Stokkhólmi þann níunda og Héðinn kom sama dag. Björn mætti til leiks þann tíunda. Ég mætti svo í gær eftir 5 tíma ferðalag frá Skopje þrátt fyrir aðeins um 180 km. ferðlag. Vegir eru þröngir og umferð hæg og svo var stöðvað og borðað á leiðinni.  Sá sem sótti mig, og reyndar Nils Grandelius einnig, heitir Gzim og er hreint frábær náungi. Vill allt fyrir okkur gera. Á leiðinni fékk maður sögur um eyðilegginguna sem átti sér stað í stríðinu sem eru hreint ótrúlegar og hefur t.d. boðist til að keyra okkur yfir til Albaníu á frídeginum sem er hér rétt hjá.  Maður getur ekki annað en dáðst að heimamönnum fyrir alla þessu uppbyggingu sem hefur átt sér stað eftir stríð.

Kósovó-menn taka ákaflega vel á móti okkur. Þeir eru hins vegar ekki mjög reyndir í slíku mótahaldi og töluverð vandamál hafa verið til staðar. Við erum á ákaflegu góðu en litlu hóteli í 400 metra fjarlægð þar sem vel fer um okkur. Kósý og flott hótel. Reyndar hafa verið til staðar internetvandamál hjá okkur sem eru að mér sýnist þó á minnka. Vegna þeirra næ ég ekki setja inn myndir að þessu sinni. Sjálfur ætla ég mér að kaupa kósovóskt símkort til að tryggja mig betur fyrir internetvandmálum.

Á aðalhótelinu, sem er á keppnisstaðnum og flestir keppendur búa, mun internetið hins vegar vera í miklu messi. Að vera í internet-vandræðum er eitthvað sem skákmenn eiga mjög erfitt með að höndla. Ég hitti áðan forseta Skáksambands Kósovó og var hann gjörsamlega úrvinda og mjög um laga þau vandamál sem eru til staðar sem fyrst.

Tomek Delega, yfirdómari mótsins, sem var annar yfirdómara EM landsliða, var ekki ánægður með internetið á keppnishótelinu. Það virkar ekki á herberginu hans né á skrifstofu yfirdómara. Í gær þegar þeir voru að para þurftu þeir að færa til tölvuna í ýmsar áttir til að geta komið frá sér pöruninni! Ég hef fulla trú á heimamönnum sem munu örugglega komu þessum málum í betra lag.

Verðlag í Kósovó er ótrúlega lágt. Kaffi á veitingastöðum kostar aðeins hálfa evru og annað eftir því.

Opnunarhátíð mótsins fór fram í gær og var virkilega flott. Borgarstjórinn var þar í aðalhlutverki auk þess sem íþróttamálaráðherra þeirra var viðstaddur. Sérstakur heiðursgestur var Boris Kudin, einn varaforseta FIDE og fyrrverandi forseti ECU. Hann virðist vera hér hálfgerð þjóðhetja en ECU voru fyrstu íþróttasamtökin til að viðurkenna Kósovó inn í sín samtök og þar keyrði hann málið í gegn. Mér skilstað að nýlega hafa alþjóða knattspyrnusambandið svo samþykkt Kósovó. Það fór ekki framhjá manni hversu heimamenn eru stoltir að halda mótið hér og stoltir af sínu landi. Strákarnir Hannes, Héðinn, Björn og Gummi voru allir teknir í sjónvarpsviðtal í gær. Treysti því að Donika finni út með birtingu og komi því á internetið!

Læt þetta duga í bili. Stefni á  pistla a.m.k. annan hvern dag.

• Heimasíða mótsins
• Beinar útsendignar (kl. 13:45)
• Chess-Results

Kveðja frá Gjakova,
Gunnar Björnsson