Fannar og Eyþór umdæmismeistarar í skólaskák

Umdæmismót í skólaskák var teflt í Skákheimili Skákfélags Akureyrar síðasta vetrardag, 20. apríl. Sjö keppendur voru mættir til leiks í yngri flokki (1-7. bekk) og fjórir í eldri flokki (8-10. bekk). Tefldar voru 10 mínútna skákir. 

Í eldri flokki var tefld tvöföld umferð. Baráttan var mjög jöfn og eftir að þeir Eyþór Kári og Arnar Smári komu jafnir í mark, þurftu þeir að tefla til úrslita um meistaratitilinn. Þar réð dramatíkin ríkjum; í fyrri skákinni pattaði var Eyþór með unnið tafl, en pattaði andstæðinginn óvart! Þeir þurftu því að tefla aðra skák; þá sást Arnari yfir má í einum leik(!), missti tökin eftir það og tapaði.

Í yngri flokki stóð baráttan milli þeirra Fannars Breka og Gabríels Freys, sem vann þennan flokk í fyrra. Skák þeirra í næstsíðustu umferð var alger úrslitaskák og þar hafði Fannar betur. 

Sigurvegararnir í báðum flokkum unnu sér rétt til að keppa á Íslandsmótinu í skólaskák sem fram fer 6-8. maí í Smáraskóla.  Þar sem Norðurland eystra á í þetta sinn rétt á tveimur sætum í eldri flokki, gefur annað sæti Arnars Smára honum einnig keppnisrétt á mótinu.