Jóhann Ingvason hefur tryggt sér sæti í landsliðsflokki - mikil spenna um hver fær hitt sætið

Jóhann Ingvason (2171) tryggði sér sigur í áskorendaflokki Skákþings Íslands með því að vinna Þorvarð F. Ólafsson (2195) í æsispennandi skák í gær í áttundu og næstsíðustu umferð. Þar er með ljóst að feðgar tefla í landsliðsflokknum í júní nk. en Örn Leó, sonur Jóhanns, hafði tryggt sér keppnisrétt með því að verða unglingameistari Íslands.

Fullkomlega óljóst er hins vegar um hver fylgir Jóhanni í landsliðsflokk því fimm skákmenn eru í 2.-6. sæti með 5,5 vinninga. Það stefnir því í gríðarlega spennandi umferð sem hefst kl. 14 í dag. Þess má geta að lokaumferðin verður tefld í félagsheimili Breiðabliks á annarri hæð (Fífunni) - ekki í Stúkunni sjálfri en göngufjarlægðin er um 1 mínúta.

Staða efstu manna er sem hér segir 

Sjá einnig hér.

Verði tveir eða fleiri jafnir í skiptu öðru ræður stigaútreikningur endanlegri röð keppenda. 

Segja má að úrslit gærdagsins hafa hleypt mótinu fullkomlega upp. Davíð Kjartansson (2348) vann Oliver Aron Jóhannesson (2177) og náði honum þar með að vinningum. Sama gerði Lenka Ptácníková (2192) með því að leggja Björgvin Víglundsson (2164) að velli. Dagur Ragnarsson (2243) náði einnig að blanda sér í baráttuna með sigri gegn Gauta Páli Jónssyni (1996) 

Úrslitin má finna hér.

Í lokaumferðinni, sem hefst kl. 14 og rétt er að minna á að hún fer fram í Félagsheimili Breiðabliks, mætast á efstu borðum:

• Jóhann Ingvason (7) - Lenka Ptácníková (5,5)
• Dagur Ragnarsson (5,5) - Oliver Aron Jóhannesson (5,5)
• Davíð Kjartansson (5,5) - Jón Trausti Harðaron (5)
• Vignir Vatnar Stefánsson (5) - Björgvin Víglundsson (5,5)

Allar þessar viðureignir geta ráðið úrslitum um hver fylgir Jóhanni í landsliðsflokk. Pörunina í heild sinni má finna hér.