Indverjarnir við suðumark: Gupta með vinningsforskot – Tania Sadchev með stórmeistaraáfanga

Indverjarnir Abhijeet Gupta og Tania Sadchev halda áfram að gera frábærta hluti á GAMMA Reykjavíkurskákmótinu í Hörpu. Gupta vann í dag Svíann Nils Grandelius og hefur vinningsforskot á næstu menn. 

Tania Sachdev hefur algjörlega slegið í gegn í Reykjavíkurskákmótinu. Hún  gerði í dag jafntefli við Armenann sterka Sergei Movsesian og þar með er ljóst að hún hefur tryggt sér áfanga að stórmeistaratitli. Hún er í skiptu sjöttu sæti.

Fimm skákmenn geta náð Gupta að vinningum tapi Indverjinn á morgun. Það eru Búlgarinn Cheparinov, Englendingurinn Jones, Aserinn Mamedyarov, Rússinn Andreikin og Ítalinn ungi Rambaldi en sá er aðeins 16 ára. 

Guðmundur Kjartansson, sem vann ítalska stórmeistarann Danyyil Dvirnyy, er efstur Íslendinga með 6,5 vinning. Hjörvar Steinn Grétarsson, Bragi Þorfinnsson og Stefán Kristjánsson eru næstir Íslendinga með 6 vinninga.

Ungstirnið, Awonder Liang, sem er aðeins 12 ára, er heldur betur að slá í gegn og vann Henrik Danielsen í dag og hefur 6,5 vinning. Hann er sem stendur yngsti alþjóðlegi meistari heims.

Í lokaumferðinni sem hefst kl. 11 á morgun teflir Gupta við Rambaldi, Mamedyarov við Cheparinov og Andreikin við Jones.

Guðmundur mætir Grandelius í lokaumferðinni, Bragi við armenska stórmeistarann Gabriel Sargassian og Hjörvar danska alþjóðlega meistarann Korley Kassa.

 

 

• Heimasíða mótsins
• Bein útsending: FM Ingvar Þór Jóhannesson og FM Manuel Weeks
• Bein útsending: Efstu 25 borðin
• Myndasafn
• Viðtöl og eldri útsendingar
• Skákir mótsins - PGN