Setning GAMMA Reykjavíkurskákmótsins hefst kl. 14:30 í

GAMMA Reykjavíkurskákmótið hefst í Hörpu í dag. Mótið er sett kl. 14:30 en sjálf taflmennskan hefst um kl. 15.

Illugi Gunnarsson, mennta- og menningarmálaráðherra, og Dagur B. Eggertsson, borgarstjóri í Reykjavík, munu bjóða hina erlendu keppendur velkomna og tríó Óskars Guðjónssonar leika skemmtilegan jazz. Skákáhugamenn eru hvattir til að fjölmenna. 

Um 250 manns taka þátt í mótinu sem hefur sjaldan verið sterkara.  Í mótinu í ár má finna allt í senn undrabörn, ofurstórmeistarar, sterkustu skákkonur heims og goðsagnir! 

Aldursmunur keppenda er 73 ára en sá elsti er Páll G. Jónsson (fæddur 1933) en Páll er sá elsti sem þátt hefur nokkurn tíma tekið. Stefán Orri Davíðssson og Freyja Birkisdóttir eru þau yngstu en þau eru fædd árið 2006. 

Ofurmeistararnir

Aserinn Shakhriyar Mamedyarov er stigahæstur keppenda en hann hefur 2747 skákstig. Næstir koma Rússinn Dmitry Andreikin (2732), Ungverjinn Richard Rapport (2721) og Armeninn Gabriel Sargassian (2702). Allt eru þetta lykilmenn í sínum landsliðum.

Heimavarnarliðið

Íslenska heimavarnarliðið mætir með Hannes Hlífar Stefánsson  fremstan í flokki, fimmfaldan sigurvegara Reykjavíkurskákmótsins. Einnig eru skráðir til leiks stórmeistararnir Hjörvar Steinn Grétarsson, Henrik Danielsen og Stefán Kristjánsson.

Goðsagnirnar láta sig ekki vanta

Það eru ekki bara ungir menn á menn því ávallt taka þátt í mótinu nokkrar goðsagnir. Í ár má nefna hinn norska Simen Agdestein, sem hefur meðal annars þjálfað Magnus Carlsen, hinn rúmenska Mikhail Marin og Alexander Beljavsky sem var meðal annars Ólympíumeistari með Sovétmönnum.

Carlsen og Fischer mæta!

Pabbi heimsmeistarans, Henrik Carlsen, lætur sig ekki vanta á GAMMA Reykjavíkurskákmótið nú sem endranær en hann er einn fastagesta. Bandaríski skákmeistarinn, Robert James Fischer, mættir einnig en sá er alls óskyldur heimsmeistaranum fyrrverandi.

GAMMA Capital Management hf. er aðalstyrktaraðili mótsins ásamt Reykjavíkurborg.