Opnunarveisla Reykjavíkurskákmótsins hefst kl. 16 á Skybar - mótið hefst á morgun kl. 14:30

GAMMA Reykjavíkurskákmótið hefst í Hörpu þriðjudaginn 8. mars. Um 250 manns taka þátt í mótinu sem hefur sjaldan verið sterkara.  Í mótinu í ár má finna allt í senn undrabörn, ofurstórmeistarar, sterkustu skákkonur heims og goðsagnir! Á  mótinu taka þátt skákmenn á aldursbilinu 9-73 ár sem er ákaflega lýsandi fyrir einkunnarorð skákarinnar – Við erum ein fjölskylda!

Í dag á milli 16:00-17:30 eru keppendur og allir skákáhugamenn boðnir velkomnir í opnunarveislu mótsins á Skybar (Hótel Arnarhvoli - beint á móti Hörpu). Tilvalinn vettvangur til að hitta keppendur og blanda geði við. Hamingjustund (Happy Hour) verður á Skybar á meðan opnunarveislunni stendur. 

Efnilegustu skákmenn heims mæta

Það hefur ávallt verið stefna Reykjavíkurskákmótsins að bjóða hingað ungum og efnilegum skákmönnum. Í ár má nefna hinn ítalska Fransesco Rambaldi  sem er aðeins 16 ára, og einn yngsti stórmeistari heims, hinn norska Aryan Tari  sem er yngsti stórmeistari Norðurlanda og bandaríska undrabarnið Awonder Liang. Hann er aðeins 12 ára og er sá yngsti í skáksögunni sem hefur unnið stórmeistara en það afrekaði hann aðeins 9 ára. Hann er sem stendur yngsti alþjóðlegi meistari heims!

Sterkar skákkonur!

Sterkar skákkonur eru áberandi í ár.  Má þar nefna hina þýsku Elizabetu Paetz og hina indversku Tönju Sachdev sem er þjóðþekkt í Indlandi. Helsti styrktaraðili hennar er Red Bull. 

Ofurmeistararnir

Aserinn Shakhriyar Mamedyarov er stigahæstur keppenda en hann hefur 2747 skákstig. Næstir koma Rússinn Dmitry Andreikin (2732), Ungverjinn Richard Rapport (2721) og Armeninn Gabriel Sargassian (2702). Allt eru þetta lykilmenn í sínum landsliðum.

Heimavarnarliðið

Íslenska heimavarnarliðið mætir með Hannes Hlífar Stefánsson  fremstan í flokki, fimmfaldan sigurvegara Reykjavíkurskákmótsins. Einnig eru skráðir til leiks stórmeistararnir Hjörvar Steinn Grétarsson, Henrik Danielsen, Stefán Kristjánsson og Þröstur Þórhallsson.

Goðsagnirnar láta sig ekki vanta

Það eru ekki bara ungir menn á menn því ávallt taka þátt í mótinu nokkrar goðsagnir. Í ár má nefna hinn norska Simen Agdestein, sem hefur meðal annars þjálfað Magnus Carlsen, hinn rúmenska Mikhail Marin og Alexander Beljavsky sem var meðal annars Ólympíumeistari með Sovétmönnum.

Carlsen mætir!

Pabbi heimsmeistarans, Henrik Carlsen, lætur sig ekki vanta á GAMMA Reykjavíkurskákmótið nú sem endranær en hann er einn fastagesta. 

Setning mótsins hefst kl. 14:30 þriðjudaginn 8. mars í Hörpu. Illugi Gunnarsson, mennta- og menningarmálaráðherra, og Dagur B. Eggertsson, borgarstjóri í Reykjavík, munu bjóða hina erlendu keppendur velkomna og tríó Óskars Guðjónssonar leika skemmtilegan jazz. 

GAMMA Capital Management hf. er aðalstyrktaraðili mótsins ásamt Reykjavíkurborg.