Skákþáttur Morgunblaðsins: Huginn og TR berjast um Íslandsmeistaratitil skákfélaga

Sveitir Hugins og Taflfélags Reykjavíkur munu berjast um Íslandsmeistaratitilinn í seinni hluta Íslandsmóts skákfélaga í Rimaskóla um helgina. Fyrir sjöttu umferð mótsins sem hófst á fimmtudagskvöldi hafði Huginn ½ vinnings forskot á TR en úrslit keppninnar gætu ráðist í dag þegar sveitirnar mætast í næstsíðustu umferð. Efstu þrjár sveitir Íslandsmótsins öðlast keppnisrétt í Evrópukeppni taflfélaga sem fram fer í Novi Sad í Serbíu næsta haust.

Staðan fyrir lokaumferðirnar fjórar var þessi:

1. Huginn 32 v. ( af 40 ) 2. Taflfélag Reykjavíkur 31 ½ v. 3. Skákfélag Akureyrar 23 v. 4. Fjölnir 21 v. 5. Víkingaklúbburinn 20 ½ v. 6. Huginn b-sveit 18 ½ v. 7. Taflfélag Bolungarvíkur 16 v. 8. – 10. Skákdeild KR, Skákfélag Akureyrar b-sveit og Taflfélag Reykjavíkur b-sveit 12 ½ v. 

Hou Yifan komst yfir í heimsmeistaraeinvíginu

Kínverska skákdrottningin Hou Yifan sem talin er fremsta skákkona heims í dag vann aðra skákina í einvígi sínu við heimsmeistara kvenna Maríu Muzychuk og eftir tvær fyrstu skákirnar er staðan 1 ½: ½ þeirri kínversku í vil. Einvígið fer fram í Lviv í Úkraínu. Í skákinni á fimmtudaginn kom upp opna afbrigði spænska leiksins og lengi framan af var staðan í járnum. 

2. einvígisskák:

Spænskur leikur

Hou Yifan – María Muzychuk

Spænskur leikur

1. e4 e5 2. Rf3 Rc6 3. Bb5 a6 4. Ba4 Rf6 5. O-O Rxe4 6. d4 b5 7. Bb3 d5 8. dxe5 Be6 9. Be3

Vinsælast er 9. Rbd2 og 9. De2 kemur einnig til greina.

Be7 10. c3 O-O 11. Rbd2 Dd7 12. Bc2 Rxd2 13. Dxd2 Bg4 14. Bf4 Bxf3 15. gxf3 Had8 16. Hfd1 De6 17. De3 Hd7 18. Bg3 g6 19. a4 Rd8 20. axb5 axb5 21. f4 f6 22. exf6 Dxf6 23. De2 c6 24. Dg4 Hb7 25. f5 Bd6 26. Ha6!

Vegna möguleikans – Hxd5 síðar meir reynist þessi leikur erfiður viðfangs. Svartur á þó að geta haldið jafnvægi.

Hg7 27. fxg6 Bc5??

Afleitur leikur. Eftir 27. ... Bxg3 28. Dxg3 De6 er staðan í jafnvægi.

28. Kg2 hxg6

29. Hxd5! Bxf2 30. Bb3! Re6 31. Hd6 Bc5 32. Dxe6+

- og svartur gafst upp. 

Magnús Carlsen ver titilinn í New York

Í áskorendakeppninni sem hefst í Moskvu 10. mars öðlast sigurvegarinn rétt til að skora á heimsmeistarann Magnús Carlsen. Átta skákmenn hefja leikinn og tefla tvöfalda umferð. Nú liggur fyrir að heimsmeistaraeinvígið mun fara fram í New York dagana 11.-30. nóvember nk. Fyrirtækið Agon, sem var framkvæmdaraðili heimsmeistaramótsins í hraðskák og atskák í Berlín sl. haust, mun annast einvígishaldið. Tefldar verða 12 skákir. 

 

Átta krakkar í úrslitum „barna-blitz“

Alþjóðlega Reykjavíkurskákmótið hefst í Hörpu á þriðjudag og eru um 250 keppendur skráðir til leiks. Reykjavíkurskákmótið hefur undanfarin ár fengið á sig æ meira svipmót skákhátíðar og meðal vinsælla keppnisgreina til hliðar við aðalmótið er hraðskákkeppnin „barnablitz“ en þar er keppt eftir tímafyrirkomulaginu 4 2. Undankeppnir hafa víða farið fram síðustu daga en þeir átta krakkar sem munu tefla til úrslita í höfuðstöðvum aðalstyrktaraðila Reykjavíkurskákmótsins, GAMMA, eru Alexander Oliver Mai, Joshua Davíðsson, Óskar Víkingur Davíðsson, Robert Luu, Sindri Briem, Sindri Snær Kristófersson, Stephan Briem og Sæmundur Árnason.

Grein þessi birtist í Morgunblaðinu 5.mars 2016

Skákþættir Morgunblaðsins