Huginn með 2ja vinninga forskot fyrir lokadag Íslandsmóts skákfélaga - Huginn og TR mætast kl. 11

Það eru miklar sviptingar a Íslandsmóti skákfélaga og skiptast Skákfélagið Huginn og Taflfélag Reykjavíkur á því að vera í forystu. Huginsmenn endurheimtu forystuna í gær með því að vinna stórsigur, 7½-½, á b-sveit Skákfélags Akureyrar. Á sama tíma þurftu TR-ingar  að sætta sig við 5-3 sigur á Taflfélagi Bolungarvíkur. Þar með náði Huginn 2ja vinninga forskoti. Þessi lið mætast kl. 11 í dag og viðureign sem gæti hæglega ráðið úrslitum. Teflt er í Rimaskóla. 

Halldór Grétar Einarsson (Bolungarvík), sem var fimmtugur í gær, hélt upp á afmælið með óvæntum sigri á alþjóðlega meistaranum Braga Þorfinnssyni (TR).

Skákdeild Fjölnis náði þriðja sætinu af Skákfélagi Akureyrar með 5-3 sigri og standa best af vígi í baráttunni um bronsið. B-sveit Hugins gerði 4-4 jafntefli við Skákdeild KR og b-sveit TR vann Víkingaklúbbinn með minnsta mun og koma sér upp úr fallsæti með þeim vinningi. 

Fallbaráttan er í fullum gangi en þar berjast b-sveitir TR og SA og Skákdeild KR. Eitt af þessum liðum heldur sér uppi. KR-ingar mæta b-sveit Akureyringa í afar mikilvægari viðureign kl. 11.

Einstaklingsúrslit má nálgast á Chess-Results.

Staðan er sem hér segir:

1. Skákfélagið Huginn 45½ v.
2. Taflfélag Reykjavíkur 43½ v.
3. Skákdeild Fjölnis 32 v.
3. Skákfélag Akureyrar 30½ v.
5. Skákfélagið Huginn b-sveit 26 v.
6. Víkingaklúbburinn 25 v.
7. Taflfélag Bolungarvíkur 23½ v.
8. Taflfélag Reykjavíkur b-sveit 19 v.
9. Skákdeild KR 18½ v.
10. Skákfélag Akureyrar b-sveit 16½ v.

Mótstöflu má finna á Chess-Results.

 

2. deild

Skákfélag Reykjanesbæjar er með yfirburði í 2. deildinni og virðist ekkert geta komið í veg fyrir það þeir vinni sér sæti í deild þeirra bestu að ári. C-sveit TR er í öðru sæti með 19 vinninga og Haukar eru í þriðja sæti með 17 vinninga eftir stórsigur á Garðbæingum í gær. 

Botnbaráttan er afar afar hörð en þar berjast Skákfélag Selfoss og nágrennis, Skákfélag Íslands og Borgnesingar. Eitt af þessum þremur liðum heldur sér uppi.

Staðan

1. Skakfélag Reykjansbæjar 24½ v.
2. Taflfélag Reykjavíkur 19 v.
3. Skákdeild Hauka 17 v.
4. Skákfélagið Huginn c-sveit 15 v.
5. Taflfélag Garðabæjar 14½ v.
6. Skákfélag Selfoss og nágrennis 10½ v.
7. Skákfélag Íslands 10 v.
8. UMSB (Borgarnes) 9½ v.

Mótstaflan

3. deild

Vinaskákfélagið hefur þar mikla yfirburði og er í forystu með 10 stig. c-sveit Skákfélag Akureyrar er í öðru sæti með 7 vinninga. B-sveitir Fjölnis og Skákfélags Reykjanesbæjar og d-sveit Hugins eru í 3.-5. sæti með 6 stig. 

Staðan á Chess-Results.

4. deild

Hrókar alls fagnaðar fara mikinn og eru efstir með 10 stig. Skákdeild Breiðabliks er í öðru sæti með 9 stig og b-sveit Vinaskákfélagsins er í þriðja sæti með 8 stig.

Staðan á Chess-Results.