Joshuna og Sæmundur áfram á Barna Blitz eftir Fjölnis-undanrásir

Fjölmennustu undanrásir skákfélaganna í keppni um eftirsótt sæti í úrslitakeppni á Barna-Blitz 2016 voru hjá Skákdeild Fjölnis í Rimaskóla þangað sem 35 keppendur mættu til leiks. Flestir þátttakendur komu úr röðum Fjölnismanna, en í þeirra hópi er breiddin afar mikil en jöfn. Skákdeildin naut aðstoðar Stefáns Bergssonar við framkvæmd mótsins og voru tefldar 6 umferðir með fyrirkomulagi hraðskáka.

Skákhlé var gert eftir fjórar umferðir og keppendum boðið upp á gómsæta skúffuköku. Á þeim tímapunkti var Joshua Davíðsson einn efstur og ósigraður en um tugur annarra með þrjá vinninga eða minna. Fyrir lokaumferðina var ljóst að Joshua hafði tryggt sér sæti á Barna-Blitz eftir sigur í öllum fimm skákunum en næstir í röðinni komu þeir Kristján Dagur Jónsson og Sæmundur Árnason. Þeir tveir síðarnefndu tefldu saman í lokaumferðinni, hreina úrslitaskák um síðara Blitz sætið og reyndist viðureign þeirra jöfn og spennandi. Eftir sviptingar á báða bóga fór það svo að Sæmundur landaði sigri og mætir með Joshua á úrslitamót Reykjavik Open, Barna-Blitz sunnudaginn 13. mars. Í lok mótsins var líkt og á öllum miðvikudagskákæfingum Fjölnis í vetur afhent verðlaun og voru það 16 efstu þátttakendurnir sem duttu þar í lukkupottinn.

Sjá nánar á Chess-Results.