Skákdagurinn framundan

Skákdagurinn verður haldinn hátíðlegur um allt land þriðjudaginn næsta, 26. janúar á afmælisdegi Friðriks Ólafssonar. Þá sameinast Íslendingar um að taka upp taflborðin þjóðhetjunni til heiðurs.

Friðrik verður 81. árs á Skákdaginn. Hann tefldi nýlega með Gullaldarliði Íslands á EM landsliða sem haldið var í Laugardalshöll og hefur síðustu árin verið virkur í taflmennsku.

Nú liggja fyrir ýmsir viðburðir á sjálfan Skákdaginn sem og í allri afmælisvikunni.

Taflfélagið Huginn heldur hraðkvöld mánudaginn 25. janúar. Í verðlaun verður bókin um feril Friðriks; „50 valdar sóknarskákir“. Bók sú er orðin fágæt.

Skákdeild KR í samstarfi við Gallerí Skák stendur fyrir hinu árlega kapptefli um Friðrikskónginn. Um er að ræða mótaröð og er fyrst teflt mánudaginn 25. janúar í Skákherberginu í Frostaskjóli.

ÆSIR sem tefla nær alla þriðjudaga ársins munu tefla Friðriki til heiðurs á sjálfan Skákdaginn í húsakynnum sínum að Stangarhyl.

Riddarinn í Hafnarfirði efnir til sérstaks Friðriksmóts miðvikudaginn 27. janúar.

Grunnskólinn í Hveragerði hefur verið með mikla skákkennslu í vetur og tekur m.a. þátt í verkefni Skáksambandsins Skák eflir skóla – kennari verður skákkennari. Alþjóðlegi meistarinn Guðmundur Kjartansson teflir fjöltefli við nemendur skólans á Skákdaginn

Stefán Bergsson heimsækir nemendur Kerhólsskóla á Skákdaginn og verður með skákkynningu- og kennslu.

Þá verða vígð skáksundlaugarsett um allt land m.a. á Þórshöfn á Langanesi, Hvammstanga, Eskifirði og Reyðarfirði.

Skákfélög, skólar, fyrirtæki og stofnanir eru hvött til þess að taka upp skákborðin á Skákdaginn og senda tilkynningu um viðburði og fréttir á [e-mail]