HM ungmenna: 11. pistill

10. umferðin, sem fór fram í gær, var okkar versta hingað til; 5 vinningar af 17. Stundum skiptast á skin og skúrir í þessum bransa. Það er spurning hvort góði árangurinn í 9. umferð hafi verið of mikil innspýting í hópinn en það var eitthvað einbeitingarleysi í flestum íslensku keppendunum í gær.

Adam byrjaði á því að vinna, í góðri skák, gegn Kungys (1211) frá Litháen. Hann fékk þægilegra tafl eftir byrjunina og fórnaði tveimur peðum á meðan hann kom mönnum sínum á framfæri. Andstæðingurinn skildi mest allt lið sitt eftir uppi í borði og Adam þakkaði pent fyrir sig, fórnaði skiptamun, og mátaði. Mjög vel klárað! Veronika hafði hvítt á Gabrielu Ebeling (1515) sem kemur úr stórri finnskri skákfjölskyldu. Veronika var vel undirbúin fyrir byrjunina og fékk snemma þægilega stöðu. Í miðtaflinu tókst henni að vinna mann og eftir það var úrvinnslan auðveld. Góður sigur.

Dawid Kolka hafði hvítt gegn Adar (2060) frá Ísrael. Dawid fékk yfirburðartafl eftir byrjunina en var heldur bráður á sér í framhaldinu og hleypti Ísraelsmanninum aðeins inn í skákina. Staðan var sem betur fer það góð að það skipti ekki máli og Dawid vann fínan sigur. Hann hefur verið á góðu skriði í síðustu umferðum.

Jón Trausti hafði svart á Narayanan (1758) frá Bandaríkjunum. Hann fékk fína stöðu eftir byrjunina en hvítur settist í skotgrafirnar, beið rólegur, og var greinilega mjög sáttur með jafntefli. Jóni tókst að setja töluverða pressu á Narayanan en fann aldrei neitt afgerandi. Í tímahrakinu fékk Bandaríkjamaðurinn mótspil og náði í framhaldinu þráskák. Símon hafði svart gegn Tahbaz (2350) frá Íran, í beinni útsendingu á efstu borðunum. Þessi skák var ótrúlega spennandi. Símon tefldi Najdorf-afbrigði sikileyjarvarnar og fékk fína stöðu. Í miðtaflinu tókst honum að töfra fram kröftugt mótspil á drottningarvæng á meðan Íraninn þandi sig á kóngsvæng. Í kjölfarið fórnaði Símon manni og fékk óstöðvandi frípeð á a-línunni. Íraninn gat gefið skiptamun til að stöðva peðið en tók í staðinn þá ákvörðun að leyfa Símoni að vekja upp drottningu svo skyndilega var hann með tvær drottningar í miðtaflinu! Í framhaldinu kom upp staða þar sem Símon hafði tvo hróka og drottningu gegn tveimur hrókum og biskupapari Tahbaz. Sú staða var ekki eins einföld og við héldum því biskupaparið var ótrúlega öflugt. Eftir mikið sprikl hvíts í framhaldinu þráléku keppendur í óljósri stöðu. Svolítið svekkjandi að ná ekki að vinna þessa skemmtilegu skák en engu að síður fyrirfram góð úrslit hjá Símoni sem er búinn að standa sig frábærlega á mótinu.
Róbert hafði hvítt á CM Low (1798) frá Kanada. Róbert tefldi byrjunina vel en missti nokkrum sinnum af góðum sóknarleiðum í miðtaflinu. Hann komst út í hróksendatafl, peði yfir, og átti góða vinningsmöguleika. Skákin fjaraði þó út í jafntefli sem svartur mátti þakka fyrir. Með örlítið meiri ákveðni hefði Róbert vafalaust unnið skákina. Freyja hafði svart gegn Ziegenfuss (1608) frá Þýskalandi. Freyja hefur verið að bæta sig jafnt og þétt frá því að mótið hófst. Hún tefldi byrjunina vel, enda hafði hún undirbúið sig sérstaklega fyrir hana. Hún vann peð en gaf andstæðingnum smá spil í framhaldinu. Hún vann skiptamun en vegna veikrar kóngstöðu Freyju voru sífelldar hættur á þráskák. Með örlítið meiri nákvæmni hefði hún átt góða sigurmöguleika en á endanum fann Ziegenfuss leið til að þráskáka og jafntefli varð niðurstaðan. Oliver, Dagur, Jón Kristinn, Björn Hólm, Bárður Örn, Hilmir Freyr, Heimir Páll, Vignir Vatnar, Óskar Víkingur og Stefán Orri töpuðu allir.

Erfið umferð en svona er þetta stundum. Þegar þessi orð eru skrifuð er lokaumferðin nýhafin. Í kvöld er svo verðlaunaafhending en við stefnum að því að nota frítímann vel í dag og fara út í sólina.

Bestu kveðjur,
Björn Ívar