HM ungmenna: 7. pistill

6. umferð

 

Andstæðingur Dags tefldi stíft upp á jafntefli og skipti upp á öllu sem hann gat. Stundum verða menn bara að sætta sig við það þegar þeir eru með svart enda fékk Dagur fá færi á að tefla til vinnings og sættist á jafntefli. Oliver hafði hvítt gegn hinum albanska Timoleo Mico (2075). Hann fékk mun betra tafl út úr byrjuninni og svartur gerði lítið annað en að bíða og halda sér fast og hætti sér bara einu sinni í skákinni yfir fimmtu reitaröðina. Á ákveðnum tímapunkti í skákinni lék Mico Rc6-Rb8-Ra6-Rc5-Ra6-Rb8 á meðan Oliver bætti stöðu sína jafnt og þétt og yfirspilaði andstæðinginn að lokum. Símon hafði svart gegn FM Sven Tica (2300). Við höfðum litið á nokkuð skynsama leið til að mæta byrjunartaflmennsku Tica og hún kom einmitt upp í skákinni. Símon vann mann fyrir tvö peð en varð að láta eitt peð af hendi til viðbótar í framhaldinu og fékk upp endataflsstöðu sem var því miður ekki hægt að vinna. Jafntefli voru engu að síður góð úrslit fyrir framhaldið í mótinu hjá Símoni, sem hefur verið að tefla vel. Jón Kristinn hafði svart gegn Ted Shpati (1918) frá Albaníu.  Það skiptist upp á drottningum í byrjuninni og Jón Kristinn sýndi í framhaldinu yfirburði sína í endataflinu og vann peð og skákina í framhaldinu. Öruggur sigur. Jón Kristinn er í beinni útsendingu í dag, á einum af efstu borðunum, gegn FM Makhnyov (2399). 

 

Bárður Örn hafði svart gegn Liao Yu Hao (1844) frá Kína. Hann hafði undirbúið sniðuga leið í spænska leiknum með Helga og fékk hana einmitt upp í skákinni. Andstæðingurinn var ekki vel með á nótunum og Bárður fékk mun þægilegra tafl sem hann nýtti sér vel og vann af öryggi. Dawid Kolka hafði hvítt á Jacky-Long Mouthuy (1462). Mouthuy kom Dawid aðeins á óvart í byrjuninni en hann fékk engu að síður fína stöðu. Hann náði ekki að nýta sér yfirburðina í framhaldinu og varð að sætta sig við jafntefli. 

 

Heimir Páll hafði svart gegn Tynyshbayev (1095) frá Kasakstan. Heimir fékk góða stöðu út úr byrjuninni og sýndi mun meiri stöðuskilning en andstæðingurinn. Hann herjaði á veikleikana í peðastöðu hvíts og vann af öryggi í framhaldinu. 

Vignir Vatnar hafði hvítt á Muhammet Ezizov (1760) frá Túrkmenistan. Vignir kom andstæðingnum á óvart með því að tefla nýja leið í byrjuninni. Hann uppskar betri stöðu og yfirspilaði Ezizov í miðtaflinu og vann af öryggi. Vignir hefur aftur hvítt í dag gegn FM Aydincelebi (2247) frá Tyrklandi. Óskar Víkingur hafði hvítt gegn Revaliente (1567) frá Spáni. Óskar fékk snemma frumkvæðið í skákinni og tefldi listavel í framhaldinu. Svartur náði varla að koma mönnunum út og Óskar innsiglaði sigurinn með skemmtilegri mátfléttu. Lok skákarinnar birtast í Fréttablaðinu á morgun, mánudag. Freyja hafði svart gegn Venkataraja frá Bandaríkjunum. Freyja fékk á sig byrjunarleið sem hún hafði ekki mætt áður og þurfti að eyða talsverðum tíma á byrjunina. Hún leysti vel úr vandamálunum sem upp komu og hélt jöfnu með góðri taflmennsku. Jón Trausti og Veronika töpuðu bæði eftir ónákvæmni í byrjuninni. Einnig töpuðu Björn Hólm, Hilmir Freyr, Stefán Orri, Róbert og Adam.

 

Ég vaknaði í morgun, fyrir klukkan 8, við undarlegt skvamphljóð utan við hótelið. Ég óð út á svalir og þar fyrir neðan, við bryggjuna, var háaldraður Grikki að brasa við að róa árabát í land. Aðfarirnar voru svo svakalegar að þegar hann sveiflaði árunum í hringi skullu þær á yfirborðinu með fyrrgreindu skvampi. Ekki nóg með það heldur var hann með stærðar kolkrabba um borð, sem var á stærð við heimiliskött. Kolkrabbinn var flæktur í háf, sem kallinn hafði í bátnum, en gerði sitt allra besta við að losna þaðan svo gamli maðurinn þurfti ítrekað að hafa áhyggjur af honum og átti hann nógu erfitt með róðurinn fyrir. Það besta var að á hinum bakkanum stóð félagi hans, á svipuðum aldri, og hvatti hann áfram með hrópum og köllum. Ágætis byrjun á deginum.

 

Það hefur verið kaldara hjá okkur, bæði í dag og í gær, heldur en undanfarna daga. Mér skilst að það spái sól og meiri hita á 

morgun svo það horfir til betri vegar!

 

Bestu kveðjur,

Björn Ívar