Caruana og Gelfand efstir fyrir lokaumferð

Eftir tvö töp í síðustu þrem umferðunum, þar sem hann tapaði m.a. gegn Alexander Grischuk (2797) í 9. umferð, tókst Fabiano Caruana að rétta úr kútnum þegar hann mætti Kúbverjanum Leinier Dominguez (2751), sem sjálfur hafði tapað síðustu tveim skákum sínum.

Boris Gelfand (2748) hefur elt Fabiano eins og skuggi allt mótið og sá enga ástæðu til að breyta því í gær. Boris, sem er frá Ísrael, hefur ýmsa fjöruna gengið og sjóinn sopið eins og landskunnur bílasali komst svo faglega að orði. Hann mætti heimamanninum Teimour Radjabov (2726) í dag og vann léttilega í 28 leikjum.

Fabiano og Boris deila nú efsta sætinu, báðir með 6 vinninga af 10. Fabiano verður að teljast afar líklegur til að vinna mótið, enda mætir hann Evgeny Tomashevsky (2701) í lokaumferðinni á meðan Boris þarf að gíma við hinn grjótharða Peter Svidler (2732).

Evgeny Tomashevsky (2701) vann sína fyrstu skák í mótnu þegar hann mætti Caruana-bananum Dmitry Andreikin (2722). Tomashevsky sótti hart þegar Dmitry var í miklu tímahraki og tókst að vinna þrú peð áður en 40 leikjum var náð. Dmitry var nóg boðið og gafst upp í 41. leik.

Alexander Grischuk er greinilega í banastuði eftir sigurinn gegn Fabiano í 9. umferð og straujaði fyrrv. FIDE heimsmeistaran Rustam Kasimdzhanov (2706), sem sá sig nauðbeygðan til að gefast upp eftir 33 leiki.

Lokaumferðin fer fram í dag og hefst á tíma sem hentar hörðum morgunhönum eða 08:00 að íslenskum tíma!!

Fylgjast má með á Chess24 og ChessBomb