Dagur í 4-manna úrslit í kvöld

Dagur Arngrímsson gerði sér lítið fyrir og komst í 4-manna úrslit á Milljónamótinu í Las Vegas í sínum flokki. Dagur stóð sig vel í opnum flokki og var á meðal 7 keppenda í stigaflokknum 2350-2499 sem fengu 4 vinninga. Einn keppandi varð ofar og fór beint í lokaúrslitin en þessir sjö þurftu að keppa innbyrðis um þrjú laus sæti í lokaúrslitunum.

Samkvæmt upplýsingum frá Hermanni Aðalsteinssyni vann Dagur tvær af þremur 15-míntúna skákum og vann svo tvær hraðskákir og tryggði sig áfram. Þeta milljónamót hefur gert margt gott en upplýsingaflæði er ekki eitt af þeim. Nánast er vonlaust að fylgjast með öðrum flokkum en efsta flokknum sem sýndur er í beinni útsendingu. Mjög stór mínús í kladdann að geta hvorki notað heimasíðuna, twitter né chess-results til að miðla upplýsingum til fólks sem vill fylgjast með.

Dagur er því öruggur með að fá allavega 5.000 dollara í verðlaun en hann er með stigahærri mönnum í þessum úrslitum og miðað við undankeppnina er hann til alls líklegur og gæti komið heim með 40.000 dollara ef allt gengur að óskum!

Beinar útsendingar af skákunum virðast ekki í boði en bein útsending þar sem skákir í efsta flokki eru skýrðar má nálgast á millionairechess.com og chess24.com. Vonandi verður eitthvað hægt að fylgjast með en fókusinn virðist nánast eingöngu á opna flokkinn.

 

Viðbót (bætum hér við lýsingu Björns Þorfinnssonar á gærdeginum):

"Ótrúlegur Dagur í gær! Með því að ná jafntefli með epískri baráttu gegn GM Matamoros þá komst Dagur Arngrímsson í sjö manna bráðabanakeppni um þátttökurétt í Million Dollar Monday (í flokki 2350-2499). Dregið var í tvo hópa (4 manna og 3 manna) og teflt lítið mót, allir við alla. Efstu menn í hvorum hópi tryggðu sér þáttökurétt en annað sæti myndi þýða annan bráðabana gegn þeim sem lenti í öðru sæti í hinum hópnum. Andstæðingur Dags í fyrstu umferð áttaði sig ekki á því að hann hefði komist í úrslit og mætti ekki til leiks (sem í sjálfu sér er rosalegt). Næsta skák var hrikalega spennandi og var gegn IM Mandizha frá Zimbabwe. Það hallaði á Dag til að byrja með en hann sneri svo skákinni sér í hag í lokin og vann frábæran sigur. Í síðustu skákinni dugði Degi jafntefli gegn bandarískum IM og var á góðri leið með að sigla því í hús þegar katastrófa átti sér stað og hann lék af sér skákinni í einum leik. Hrikalegt að sjá og það fór um okkur alla Íslendinganna. Það þýddi aðeins eitt, meiri taugaspennu. Þá var bara að bíta í skjaldarrendur og fara í gegnum annan bráðabana. Andstæðingurinn var strembinn, bandarískt barn með 2380 af kínverskum ættum. Minni menn hefðu bugast eftir afleikinn í síðustu skák en Dagur mætti þvílíkt ákveðinn til leiks og gjörsamlega jarðaði piltinn 2-0 í hraðskákinni. Million Dollar Monday it is! Úrslitin byrja kl.18 á íslenskum tíma, fylgist með!"