Dagur 8 - Aftur til hversdagsleikans

Þá er lífið í Tromsö komið aftur í sinn „vanagang" eftir frídaginn. Í dag mætum við Færeyingum og Ísraelmönnum. Gegn þeim fyrrnefndum erum við umtalsvert stigahærri en það snýst við gagnvart Ísraelsmönnum og rúmlega það.

Umferð dagsins

Færeyingar eru sýnd veiði en ekki gefin. Þeim hefur farið mikið fram síðustu ár og hafa nú meðal skákstigin 2378 á móti 2521 skákstigi okkar. Á fyrsta borði teflir alþjóðlegi meistarinn Helgi Dam Ziska sem hefur bersýnilega styrkleika stórmeistara.

Vert er að benda einnig sérstaklega á Högna Nielsen, sem er aðeins, 17 ára og teflir á fjórða borði. Hann er skákmeistari Færeyinga en hann vann mótið með fullu húsi fyrir skemmstu. Hann er bæði sá yngsti sem hefur orðið skákmeistari Færeyja auk þess að vera sá eini sem hefur unnið mótið með fullu húsi!

Að tefla við Færeyinga er svolítið „no win situation". Það er ekkert gaman að vinna Færeyinga annað en t.d. Svía eða Dani.

Við höfum einu sinni mætt þeim áður. Það var í lokaumferðinni Ólympíuskákmótsins í Mallorca árið 2004. Þá unnum við 3-1. Hannes Hlífar og Þröstur unnu en Helgi og Stefán Kristjánsson gerðu jafntefli.

Stelpurnar tefla við visst „ofurefli", þ.e. sveit Ísraels.  Á meðan meðalstig stelpnanna eru 2008 eru meðalstig Ísraelsmanna 2256.

Við höfum teflt við þá tvívegis, 2004 og 2012. Við fengum hálfan vinning í hvort skipti. Það var Lenka sem gerði jafntefli í bæði skiptin.  Viðureignin  í dag getur orðið erfið.

Liðstjórarnir. 

Í keppnum eins og Ólympíuskákmótunum er mjög mikilvægt að hafa liðsstjóra sem vaka yfir liðum sínum. Sumir fæa liðinu sínu kaffi á maðan aðrir safna kröftum.

Toppbaráttan

Sjö lið eru efst og jöfn með 9 stig. Það eru Aserar, Serbar, Kasakar, Búlgarar, Kúbverjar, Úsbekar og Georgíumenn.  

Rússar, Frakkar og Armenar eru meðal þeirra sem hafa 8 stig.

Kínverjar, Ungverjar og Rússar eru efst í kvennaflokki með fullt hús stiga.

Norðurlandamótið

B-lið Noregs er efst í Norðurlandakeppninni með 8 stig! Norðmenn hafa 7 stig en við erum þriðju með 6 stig.

Í kvennaflokki eru Svíar efstir með 7 stig. Norðmenn hafa 6 stig ásamt okkur.

FIDE-þing

Það styttist í FIDE-kosningarnar en þær fara fram á mánudaginn. Í gær bauð Kasparov okkur stuðningsmönnum sínum úr Evrópu í bátsferð um fjörðinn þar sem boðið var uppá úrvalsveitingar eins og sels- og hvalskjöt og ferskan fisk beint uppúr sjónum!

Kasparov og hans menn skoðuðu sérstaklega hverjir mættu og ekki síst hverjir mættu ekki en t.d. vantaði fulltrúa Andorra. Atkvæði sem menn telja nú ekki mögulega á að ná í.

Kirsan Ilyumzhinov, forseti FIDE, lét sjá sig á skákstað í dag og horfði vel og lengi á nýjasta liðsmann rússneska kvenna, Katharyna Lagno!

Þegar þetta er ritað birtast hér VIP-herberginu Kirsan og Andrey Filatov, forseti rússneska skáksambandsins og með þeim fylgir fjöldinn allur af fylgifiskum. Hér eru mennirnir sem stjórna alheimshreyfingu skákhreyfingarinnar. Að sumra í mati í umboði Vladimírs Pútíns.

Læt þetta duga í bili.

Gunnar Björnsson