EM kvenna hefst í dag - Lenka tekur þátt

EM kvenna hefst í dag í Plovdid í Búlgaríu. Meðal keppenda er Íslandsmeistarinn í skák, Lenka Ptácníková (2310), sem hefur verið í miklu stuði undanfarið og hækkaði  um 46 skákstig á síðasta stigalista.

Lenka er nr. 51 í stigaröð keppenda af 116 keppendum. Í fyrstu umferð, sem hefst kl. 12 í dag teflir Lenka við fremur stigalága skákkonu (1936) frá Aserbaídsjan.

Meðal keppenda á mótinu er flestar sterkustu skákkonur Evrópu. 

Í umfjöllun á heimasíðu Hugins um mótið fyrir skemmstu segir meðal annars:

Í stuttu spjalli við skákhuginn.is sagði Lenka að mótið yrði mjög sterkt. Lenka hefur verið að tefla meira en konur yfirleitt gera að undanförnu og náði hún tveim IM áföngum karla á þessu ári. Lenka sagðist verða mjög ánægð ef henni tækist að ná einum í safnið í vðbót. 14 efstu keppendur fá þáttökurétt á World Cup.

"það væri alveg frábært ef þetta gengur, en það verður mjög erfitt. En ef mér gengur vel eins og í Teplice, þá er ekkert útilokað" sagði Lenka. Lenka hefur einu sinni áður tekið þátt í EM-kvenna en það var árið 2005 í Moldavíu.

"Það berast fréttir frá Búlgaríu um að bankar standa illa, en ég vona að allt gangi vel og við náum að klára mótinu í friði.

"Borgin Plovdiv hefur 6000 ára sögu og ég hlakka til að fara á sterk skákmót á svona áhugaverðum stað", sagði Lenka að lokum. 

Lenka verður ekki í beinni í fyrstu umferð þar sem "aðeins" 48 skákir eru sýndar beint í hverri umferð.

• Heimasíða EM kvenna
• Chess-Results
• Beinar útsendingar (hefjast kl. 12)