Skemmtilegt og spennandi sumarskákmót Fjölnis

Þeir komu þrír jafnir í mark á vinningum, þeir Mykhaylo Kravchuk, Guðmundur Agnar Bragason og Björn Hólm Birkisson í hnífjöfnu og velmönnuðu sumarskákmóti Fjölnis sem fram fór í hátíðarsal Rimaskóla. Mykhaylo var efstur þeirra á stigum og því krýndur sigurvegari mótsins og jafnframt í yngri flokk. Guðmundur Agnar varð sigurvegari í eldri flokk einu stigi hærri en Björn Hólm. Nansý Davíðsdóttir vann stúlknaflokkinn. Öll hafa þau þrjú verið sigursæl á skákmótum Fjölnis að undanförnu.

Tefldar voru 6 umferðir og hlutu efstu menn 5 vinninga. Þeir Mykhaylo og Guðmundur Agnar áttust við í lokaumferð og þar knúði Guðmundur fram vinning og jafnaði vinningatölu við Mykhaylo.

Baráttan um vinningana 15, bíómiða og pítsur, var hörð fram í síðustu skák. Auk þeirra fjögurra sem áður voru nefnd fengu verðlaun þau Bárður Örn Birkisson, Jóhann Arnar Finnsson, Robert Luu, Jóshua Davíðsson, Aron Þór Mai, Óskar Víkingur Davíðsson, Alexander Oliver Maí, Róbert Orri Árnason, Kristófer Halldór Kjartansson, Heiðrún Anna Hauksdóttir, Valgerður Jóhannesdóttir og Kjartan Karl Gunnarsson.

Rótarýklúbbur Grafarvogs gaf glæsilega verðlaunagripi til mótsins og var það heiðursgestur mótsins Gylfi Magnússon Rótarýfélagi og skákáhugamaður sem afhenti sigurvegurum verðlaunabikarana. Gylfi flutti stutt ávarp og minntist æskuára sinna vestur í Ólafsvík þegar Ottó Árnason hélt utan um unga skákmenn og fyrirmynd allra var hinn ungi Friðrik Ólafsson.

Við verðlaunaafhendinguna veitti Helgi Árnason formaður skákdeildar Fjölnis tveimur stórefnilegum skákmönnum deildarinnar viðurkenningu í lok æfingatímabilsins. Joshua Davíðsson var útnefndur afreksmaður ársins og Hákon Garðarsson hlaut titilinn æfingameistari ársins.

Stefán Bergsson frá Skákakademíu Reykjavíkur var skákstjóri og fjöldi foreldra fylgdist með, þáði kaffisopa og tók þátt í pítsaveislu frá Hróa hetti og Adam pítsum. Ölgerðin gaf ávaxtasafa og þetta 44 manna sumarskákmót reyndist glæsilegur endir á 10. starfsári Skákdeildar Fjölnis. 

Lokastöðu mótsins má finna á Chess-Results.