Ögmundur Kristinsson skákmeistari Ása

Æsir héldu sitt meistaramót í dag þar sem 29 meistarar mættu til leiks. Eins og sést á töflunni þá voru þarna margir sterkir skákmenn mættir á staðinn og til alls líklegir. Það var góður gestur mættur hjá okkur í byrjun  móts og við fengum hann til þess að leika fyrsta leikinn á fyrsta borði hjá Benedikt Bjarnasyni og Valdimar Ásmundssyni.

Þetta var Róbert Lagermann, alþjóðlegur skákdómari. Róbert var mættur á staðinn til þess að taka á móti smá gjöf frá Ásum. Eins og margir skákmenn vita þá er Hrókurinn með þá Hrafn Jökulsson og Róbert í farabroddi að vinna stórvirki á Grænlandi með því að kenna grænlenskum börnum og unglingum að tefla. Æsir gáfu þeim nokkrar skákklukkur af eldri gerðinni og töfl, sem við vonum að komi sér vel við þetta göfuga starf sem þeir eru að vinna hjá þessum góðu nágrönnum okkar í vestri.

Mótið fór svo af stað í rólegum takti. Sennilega hafa nú flestir reiknað með að baráttan yrði á milli Björgvins Víglundssonar og Ögmundar Kristinssonar meistara Ása frá síðasta ári, en það blönduðu sér fleiri í baráttuna um efsta sætið. Þeir kappar mættust svo í fimmtu umferð, báðir með 4 vinninga.Ögmundur vann þessa skák og staðan þá orðin nokkuð vænleg hjá honum

Að loknum átta umferðum var Ögmundur efstur með 7 vinninga, síðan komu þrír með 6 vinninga, þeir Björgvin Víglundsson Össur Kristinsson og Þór Valtýsson. Níunda og síðasta umferðin fór svo þannig að Ögmundur tapaði fyrir Páli G Jónssyni, þeim eitilharða skákjaxli. Björgvin, Össur og Þór unnu allir sínar skákir, þannig að þeir enduðu fjórir jafnir með 7 vinninga. Það hafði verið ákveðið að stig yrðu látin ráða í úrslitum, þannig að Ögmundur vann gullið, Björgvin silfrið og Össur bronsið.

Þór Valtýsson varð svo efstur í hópnum 70- 80 ára og fékk gullpening. Efstur í öldungahópnum 80 + varð Páll G Jónsson með 6 vinninga.Guðfinnur R Kjartansson varð efstur í unglingahópnum 60-70 ára með 6 vinninga. Páll og Guðfinnur fengu báðir gullpeninga.

Skákstjóri var Finnur Kr.

Tafla og myndir frá ESE