Jón L. Árnason nýr landsliðseinvaldur

Jón L. Árnason, var í gær, ráðinn landsliðseinvaldur í skák fram yfir Ólympíuskákmótið í Tromsö sem fram fer 1.-14. ágúst næst komandi. Jón L. tekur við af Helga Ólafssyni sem hefur látið af störfum.

Helgi baðst lausnar fyrir nokkru í ljósi þess að hann gefur nú kost á sér í ólympíuliðið sem liðsmaður. Helgi hefur verið landsliðsþjálfari/landseinvaldur síðan 2009.

Jón L. Árnason mun velja ólympíuliðið strax að loknu Íslandsmótinu í skák en keppni í landsliðsflokki, fer fram í Stúkunni í Kópavogi, 21. maí - 1. júní nk.

Við þessi tímamót, vilja landsliðsnefnd og stjórn SÍ, þakka Helga Ólafssyni sérstaklega fyrir hans góðu störf og bjóða Jón L. velkominn til starfa. Betri og hæfari mann er vart hægt að finna í starfið og skemmtilegt til þess að vita að þessi fyrrverandi heimsmeistari 17 ára og yngri, landsliðsmaður um árabil og meðlimur hinnar goðsagnakenndu fjórmenningaklíku, taki við keflinu af félaga sínum Helga Ólafssyni.

Davíð Ólafsson gegnir sem fyrr landsliðseinvaldsstöðu kvennalandsliðsins.

P.s. Þessi frétt er endurbirt (og reyndar endurbætt) því í ljós kom að sumir töldu sömu frétt í gær vera aprílgabb.