Skákmót Rótarýklúbbanna á Íslandi verður haldið 7. apríl

Rótarýklúbburinn Reykjavík – Breiðholt stendur fyrir skákmóti Rótarýklúbbanna á Íslandi, mánudagskvöldið 7. apríl nk. kl. 20.00 á Grand Hótel við Sigtún í Reykjavík og er mótið opið öllum Rótarýfélögum á landinu.

Tefldar verða 7 umferðir með styttri umhugsunartíma og er áformað ð mótið standi í um tvær klukkustundir. Veitt verða verðlaun fyrir þrjú efstu sætin í sveitakeppni en þar telja samanlagðir vinningar tveggja bestu Rótarýfélaga frá hverjum klúbbi. Jafnframt verða veitt einstaklingsverðlaun fyrir þrjú efstu sætin.

Rótarýklúbburinn Reykjavík - Breiðholt býður öllum skákáhugamönnum, sem hyggja á þátttöku í mótinu, til reglulegs fundar klúbbsins sama kvöld kl. 18.15 á Grand Hótel í Reykjavík, þar sem stórmeistararnir Friðrik Ólafsson og Helgi Ólafsson munu segja frá kynnum sínum af Bobby Fischer, fyrrum heimsmeistara í skák. Gjald fyrir kvöldverðarfund og þátttöku í mótinu er kr. 3.600 en kr. 1.000 fyrir þá sem eingöngu taka þátt í mótinu.

Skákáhugamenn Rótarýklúbbanna nær og fjær eru hvattir til að taka þátt í skemmtilegri dagskrá og léttu skákmóti. Skráningarfrestur er til 6. apríl nk. Skráning hjá formanni skáknefndar klúbbsins, Jóni L. Árnasyni, [e-mail] en auk hans skipa nefndina Jóhann Hjartarson og Guðmundur Kristinn Ingvarsson.