Kasparov: Áritanir og myndatökur í dag

 Heimsókn Garry Kasparovs á Íslandi stendur nú sem hæst. Í gær fór hann að leiði Fischers og heimsótti Fischer-safnið á Selfossi og snæddi svo kvöldverð með forsetum norrænu skáksambandanna. Þegar þessar línur eru ritaðar situr hann fund mennta- og menningarmálaráðherra og ræðir skák í skólum. 

Síðar í dag eða milli 16-17 í Hörpu mun Kasparov gefa aðdáendum sínum færi á myndatökum og áritunum á bókum sínum. Í kvöld situr hann boð forsætisráðherra ásamt fleiri gestum. Bækur hans verða til sölu á staðnum hjá Sigurbirni bóksala.

Á morgun er svo ungum íslenskum skákmönnum 20ára og yngri sem taka þátt í Reykjavíkurskákmótinu boðið að hlusta á kappann klukkan 13 í Kaldalóni þar sem skákskýringar fara fram í síðustu umferðunum.

Á myndinni sést Kasparov í stólnum sem var staðsettur í Fornbókabúð Braga Kristjónssonar og Fischer sat svo oft í.