Hollendingar efstir á N1 Reykjavíkurskákmótinu - Vignir Vatnar í banastuði

Hollensku stórmeistararnir Erwin L´ami (2646) og Robin Van Kampen (2603) eru efstir og jafnir með fullt hús að loknum fimm umferðum á N1 Reykjavíkurskákmótinu. Van Kampen vann Ungverjann Richard Rapport (2681) í afar spennandi skák.  Fimm íslenskir skákmenn eru meðal þeirra sem hafa 4 vinninga. Það er hins vegar ungstirnið Vignir Vatnar Stefánsson sem hefur sannarlega stolið senunni á mótinu.

Hjörvar Steinn Grétarsson (2511), Stefán Kristjánsson (2503), Þröstur Þórhallsson (2435), Hannes Hlífar Stefánsson (2541) og Henrik Danielsen (2501) eru efstir Íslendinga með 4 vinninga. Þeir eru í 6.-29. sæti.

Það er hins vegar hinn 10 ára Vignir Vatnar Stefánsson (1844) sem hefur sannarlega stolið senunni. Hann hefur hlotið 3,5 vinning og það þrátt fyrir að teflt við stigahærri menn í öllum umferðum. Í gær vann hann norska FIDE-meistarann Petater Stigar (2237). Í dag mætir hann suður-afríska FIDE-meistaranum Daniel Cawdery (2362).

Umferð dagsins hefst kl. 13. Þá mætast meðal annars Hollendingarnar sem leiða, Henrik teflir við stigahæsta keppanda mótsins, Þjóðverjann Arkadij Naiditisch (2706), Hannes teflir við indversku skákdrottninguna Tania Sadcev (2423) og Hjörvar og Þröstur tefla saman.

Á morgun mun svo Garry Kasparov kíkja við á skákstað við upphaf umferðar. Hann mun hins vegar árita bækur og þess háttar á mánudaginn.

Vert er einnig að benda á það að Tímaritið Skák, sem er stútfullt af efni, má nálgast á skákstað.

Í gær fór fram Reykjavik Open Pub Quis. Sigurvegar þar voru Helgi Ólafsson og Dirk Jan Geuzendam, ritstjóri New In Chess. frétt um það væntanleg síðar.

Í kvöld fer svo fram Teflt án tafar (Even Steven) sem hefst kl. 20 í Hörpu. Þar er teflt með forgjafarkerfi. Nánar verður sagt frá því á Skák.is í dag. 

Vert er að benda á Facebook-síðu N1 Reykjavíkurskákmótsins. Þar má finna fjölda mynda.

• Heimasíða N1 Reykjavíkurskákmótsins
• Facebook-síða N1 Reykjavíkurskákmótsins
• Beinar útsendingar
• Skákskýringar í beinni útsendingu
• Chess-Results