Allt eins og best verður á kosið í Sturlubúðum - Skákbúðum Fjölnis 2014

Það voru 40 mjög áhugasamir og efnilegir skákkrakkar sem lögðu af stað full eftirvæntingar í skákbúðir að Útilífsmiðstöð skáta að Úlfljótsvatni. Sturlubúðir, nefnast skákbúðir Skákdeildar Fjölnis sem í 3. sinn voru í boði í samstarfi við Skákakademíu Reykjavíkur og Skákskóla Íslands.

Skákbúðirnar bera nafn Sturlu Péturssonar sem var öflugur skákmaður og leiðbeinandi á síðustu öld. Með þessum frábæru skákkrökkum voru i för okkar bestu og öflugustu skákkennarar, Helgi Ólafsson, Lenka Ptácnikova, Stefán Bergsson og Björn Ívar Karlsson.

Að Úlfljótsvatni er frábær aðstaða fyrir allt að 60 manna hópa í vistlegum herbergjum, við góða kennsluaðstöðu, skemmtilegu útivistarsvæði og frábæru fæði að mati barnanna. Þau gerðu pítsum, lasagna, grjónagraut, ferskum ávöxtum og súkkulaðiköku góð skil.

Í skákbúðunum var boðið upp á markvissa kennslutíma og var hópnum skipt í fernt eftir getu eða annarri heppilegri samsetningu. Helgi Ólafsson sá um A hóp þar sem kennslan snerist um "silfrið" skákpróf Skákskóla Íslands. Þeir Skákakademíufélagar Stebbi Bergs og Björn Ívar kenndu sínum hópum saman og skiptust á að leggja inn nytsamlegar leiðbeiningar út frá mismunandi stöðum í byrjunar-og endatöflum. Hjá Lenku tefldu börnin frá fyrstu til síðustu mínútu og fengu endalaus ný fyrirmæli um aðferðir sem nota skyldi í það og það skiptið. Hægt er að fullyrða að ekki fæst betra tækifæri til að koma eins miklu til skila í skákkennslu eins og í skákbúðum þar sem krakkarnir eru á staðnum í tvo daga og eina nótt.

En þrátt fyrir stífa og gagnlega kennslu þá var líka í boði frjáls tími inni á herbergjum og úti við. Á kvöldvöku stjórnaði fararstjórinn, Helgi Árnason formaður Skákdeildar Fjölnis, bingói sem hann hannaði sjálfur og er talsvert frábrugðið hefðbundnu bingói. Bingóið vakti lukku þátttakenda og áhorfenda enda æsispennandi í lok hverrar umferðar.

Helgi Ólafsson skólastjóri Skákskóla Íslands sagði sögu sem að sjálfsögðu fjallaði um eftirminnilega skák Paul Morphy frá 19. öld og yfirfærð á laufléttan stíl heimsmeistarans norska í hraðskák hans gegn Anand nú í vikunni. Eftir viðburðarríkan dag voru skákbúðakrakkar tiltölulega fljótir að sofna þó að hvassviðrið gnauðaði um gáttir og glugga.

Síðari daginn í lok skákbúðanna, sem eru hinar þriðju sem Skákdeild Fjölnis stendur fyrir, var efnt til skákmóts sem allir 40 krakkarnir voru skráðir á. Nóa - Síríusmótið reyndist jafnt og spennandi og lauk með sigri skákkonunnar efnilegu Nansýjar Davíðsdóttur sem hlaut 5,5 vinninga af 6 mögulegum. Alls voru veitt 19 verðlaun fyrir árangur á Nóa Síríusmótinu auk þess sem 15 þátttakendur fengu verðlaun fyrir fyrirmyndar umgengni á herbergjum. 

Skákbúðirnar heppnuðust frábærlega enda vandað til undirbúnings og góður stuðningur að baki. Ánægðir skákkrakkar á aldrinum 6 - 13 ára skiluðu sér heim að lokinni ævintýraferð. Auk skákkennara heiðraði Gunnar Björnsson forseti Skáksambandsins skákbúðirnar með nærveru sinni allan tímann. Fararstjóri auk Helga var að venju Andrea Margrét Gunnarsdóttir frá Skákfélagi fjölskyldunnar. Nói Síríus og Ásbjörn ehf studdu framtakið með því að gefa alla vinninga og sælgætispoka á laugardegi. GM Hellir og TG greiddu niður þátttökugjöld sinna félaga en ríflegasta styrk til skákbúðanna veitti Sturla Pétursson forstjóri Gúmmívinnustofunnar sem bauð öllum Fjölniskrökkum í skákbúðirnar og þurftu þau því einungis að greiða rútuferðina.

Skáksamband Íslands gaf Útilífsmiðstöð skáta Úlfljótsvatni tvö taflsett. Framkvæmdarstjóri ÚSÚ tók við settunum úr hendi Gunnars Björnssonar forseta skáksambandsins. Settin munu án efa koma að góðum notum á Úlfljótsvatni. Skólabúðabörn og sumarbúðabörn geta þá notið þess að tefla auk þess sem settin verða til boða fyrir aðra gesti staðarins.

Öllum þessum aðilum ásamt samstarfsaðilum Skákskóla Íslands, Skákakademíu Reykjavíkur og Skáksambandi Íslands vill Skákdeild Fjölnis þakka ómetanlegan stuðning. 

Myndaalbúm (HÁ og GB)