Skákdagurinn framundan!

Nú sem endranær er mikið teflt á útmánuðum og ekki minnkar taflmennskan í aðdraganda Skákdagsins. Skákdagurinn verður haldinn hátíðlegur víða um land á sunnudaginn næsta, 26. janúar, þegar Friðrik Ólafsson verður 79 ára gamall. Friðrik er staddur í Berlín þessi misserin en biður fyrir kveðju til skákmanna.

Skáksamband Íslands leggur áherslu á að gera stelpu- og kvennaskák hátt undir höfði á árinu. Til merkis um það munu Íslandsmót stelpna í sveitakeppnum grunnskóla og einstaklingskeppni fara fram um komandi helgi. Jafnframt eru stelpunámskeið framundan í Skákskólanum. Félögin láta ekki sitt eftir liggja í stelpuskákinni: Taflfélag Reykjavíkur hefur verið með vel sóttar æfingar í allan vetur og GM Hellir hóf stelpuæfingar í vikunni.

Á Suðurfjörðum Vestfjarða rís nú mikil skákbylgja meðal ungu kynslóðarinnar. Henrik Danielsen og Áróra Hrönn Skúladóttir eiga heiðurinn af henni og mikil taflmennska framundan næstu daga fyrir vestan og ber hæst sveitakeppni milli sveita frá skólunum á Tálknafirði og Patreksfirði.

Mikið verður teflt á Suðurlandinu: Stefán Bergsson heimsækir Hellu á fimmtudag og teflir fjöltefli við nemendur grunnskólans, sem hafa verið í skáklæri hjá Björgvini Smára Guðmundssyni síðustu misserin. Á föstudag verður Stefán svo fylgdarsveinn alþjóðlega meistarans Jóns Viktors Gunnarssonar sem mun tefla fjöltefli við nemendur grunnskólans á Hvolsvelli. Mikil sókn er í taflmennsku ungra skákmanna af Suðurlandi. Skiptir þar miklu máli að Skákskóli Íslands hefur í samstarfi við Fischer-safnið og SSON staðið fyrir námskeiðum á laugardögum í allan vetur þar sem aðalkennari er Helgi Ólafsson. Helgi verður með tíma á laugardaginn á Selfossi og rennir svo í Hyrnuna í Borgarnesi á Skákdaginn sjálfan þar sem hann teflir fjöltefli við gesti.

Skákskólinn byrjar svo námskeið á vormisseri laugardaginn 25. janúar nk.

Eins og Skákdaga síðustu ára verða nokkrar sundlaugar skákvæddar víða um landið og teflt verður í skólum landsins. Skáksveit Hraunvallaskóla í Hafnarfirði tekur fjöltefli við samnemendur sína og starfsfólk skólans. Sveitin náði þriðja sæti á Íslandsmóti barnaskólasveita 2013 en hana skipa: Brynjar Bjarkason, Helgi Svanberg Jónsson, Burkni Björnsson og Þorsteinn Emil Jónsson.

Eldri borgarar verði virkir eins og svo gjarnan í kringum í Skákdaginn. Æsir í samvinnu við Riddarann stendur fyrir Toyota-skákmótinu 31. janúar nk. í höfuðstöðvum Toyota. 

Gallerý Skák stendur svo fyrir hina árlega kapptefli um Friðrikskónginn. Þar verður teflt fjóra næstu fimmtudaga og verða veitt stiga eftir Grand Prix-kerfi. Fyrsta mótið hefst kl. 18 á morgun í Gallerý Skák í Bolholti.

Fjöldinn allur annar af skákviðburðum fer fram um landið næstu daga og á Skákdaginn. Áfram verður teflt í í Skákþingi Reykjavíkir og Nóa-Síríus mótinu þar sem spennandi umferðir eru framundan. Aðra helgi fara svo fram hinar vinsælu skákbúðir Fjölnis að Úlfljótsvatni.

Upplýsingar um viðburði og fréttir af viðburðum sendist á [e-mail] og [e-mail].