Stelpudagur Skákskólans

 

Stelpudagur Skákskólans fór fram í gær. Um sextán ungar skákstelpur mættu á daginn. Þær voru á  aldrinum sex til ellefu ára og flestar byrjendur þó þær hafi lært sitthvað að tefla í grunnskólum sínum. Margar könnuðust þær t.d. við Björn Ívar Karlssoon sem kennir nú sinn þriðja vetur í grunnskólum borgarinnar.

 

Davíð Ólafsson landsliðsþjálfari kvenna stýrði deginum en honum til aðstoðar voru landsliðskonurnar Lenka Ptacnikova, Hallgerður Helga, Jóhanna Björg, Tinna Kristín og Elsa María. Davíð fór yfir námskeið vorannar fyrir stelpur sem hefst 2. febrúar og landsliðsstelpurnar munu kenna undir handleiðslu Davíðs. Kynnti Davíð auknar áherslur Skákskólans og Skáksambandsins á stelpuskák árið 2014. Í framhaldi af því var sagt frá Íslandsmótum stúlkna um næstu helgi en Skáksambandið ákvað að halda þau þá helgi sem Skákdaginn ber upp og og undirstrika þannig áherslur sínar á kvennaskák árið 2014.

Dagurinn fór vel fram í alla staði, stelpurnar tefldu sín á milli og við landsliðsstelpurnar, og foreldrar fengu upplýsingar um námskeiðið og mótið framundan.

Stelpunámskeið á vorönn 2014

Skákskóli Íslands í samstarfi við Skáksamband Íslands mun leggja sérstaka áherslu á kvennaskák á árinu 2014.

Í tilefni þess býður skólinn upp á átta vikna stúlknanámskeið nú á vorönn á sérstöku tilboðsverði 10.000 kr. innifalið í verðinu eru öll þau gögn sem þarf á námskeiðinu. Boðið verður upp á námskeið fyrir byrjendur jafnt sem lengra komna.

Aðalkennarar á námskeiðinum verða kvennalandsliðskonurnar Jóhanna Björg og Elsa María en þær munu njóta stuðnings Helga Ólafssonar skólastjóra og landsliðsþjálfara karla, Davíðs Ólafssonar landsliðsþjálfara kvenna og Lenku Ptachnikovu kvennastórmeistara í skák.

Námskeiðin munu hefjast sunnudaginn 2. febrúar - skráning á [e-mail].

Myndaalbúm