Saga Reykjavíkurskákmótsins væntanleg!

 

Hinn 14. janúar 1964 hófst fyrsta alþjóðlega Reykjavíkurskákmótið. Það á því stórafmæli í dag! Mótið spannar hálfrar aldar sögu sem speglar á einstakan hátt skáklíf á Íslandi og stöðu skákarinnar meðal þjóðarinnar. Jafnframt eru tengslin augljós  við stöðu landsins sem mikilvægrar skákmiðstöðvar og Reykjavíkur sem einnar af háborgum skákíþróttarinnar. 

Af þessu tilefni hefur Skáksamband Íslands ákveðið að ráðast í ritun bókar um sögu þessa merkilega móts. Höfundur ritverksins er Helgi Ólafsson, stórmeistari, rithöfundur og blaðamaður. Helgi er m.a. höfundur bókanna, "Bobby Fischer comes home" og Benóný (sem hann skrifaði ásamt Braga Halldórssyni og Jóni Torfasyni).

Í dag var undirritaður samningur um ritun bókarinnar á milli Helga, Skáksambandsins og Menningarfélagsins Máta sem kemur að eftirvinnslu verksins.

Áformað er að bókin komi út á árinu.

Í formála hinnar óútkomnu bókar segir Helgi meðal annars:

Um hvert hinna 28 Reykjavíkurskákmóta mætti - og hefði þurft - að rita eina bók.

Meginmarkmiðið hér er að veita yfirlit og koma helstu úrslitum fyrir á einum stað auk þess sem mikilvægar skákir, minnisstæð brot og atriði eru tekin fyrir.

Hafa ber í huga að höfundur var meðal þátttakenda á öllum Reykjavíkurskákmótunum á ákveðnu tímabili, 1976-2004, eða um nálega 30 ára skeið.

Ég hef alltaf verið mikill unnandi þessara móta og vona svo sannarlega að það komi fram í verkinu.

Hægt er að skrá sig fyrir bókinni í forsölu hér á Skák.is. Nafn þeirra sem það gera verður birt í "Tabula gratulatoria". Verð á bókinni verður 4.900 kr.

Á myndinni eru (f.v.) Pálmi R. Pétursson, varaforseti SÍ og formaður Menningarfélagsins Máta, Helgi Ólafsson, höfundar bókarinnar, og Gunnar Björnsson, forseti SÍ.