Æsir í Ásgarði - 15 ára afmælismót og jólafagnaður

Á fjórða tug skákþyrstra ellismella var mættur í Stangarhylinn til af fagna góðu starfi ÁSA -skákklúbbs félags eldri borgara- í hálfan annan áratug og hinn öldunga klúbburinn Riddarinn fagnar 15 ára afmæli líka í næstu viku jafnframt jólamóti sínu þann 18. desember.

Margir þessara skákvíkinga tefla sér til afþreyingar og yndisauka í báðum klúbbunum því skákin kætir og bætir eins og við vitum og dregur úr félagslegri einangrun sem hrjáir margan gamlingjann þegar árin færast yfir.

Tefldar voru 10 umferðir á 7 mínútum að þessu sinni áður en sest var að veislukaffi.

Ungmennið Ögmundur Kristinsson blandaði sér í hópinn og fór heim með bikar og Þorsteinn Þorsteinsson, fv. forseti SÍ og skólameistari er farinn að mætta til tafls á ný bæði hjá Ásum og Riddurunum og kemur sjálfum sér og öðrum á óvart með góðri frammistöðu.

Það var gaman að sjá Birgi Sigurðsson hin aldna formann 86 ára við mótsstjórnina og hann lét sér ekki muna um að tefla með líka þrátt fyrir að nokkurn heilsubrest.

Það var vel til fundið hjá Skáksambandinu að gera hann að heiðursfélaga á aðalfundi sínum sl. vor fyrir langt og heilladrjúgt starf að skákmálum um áratugaskeið.

Hér að neðan eru úrslit mótsins birt fyrir fréttaþyrsta skákfíkla innanlands sem utan.