Velferðarsjóður barna verðlaunar Helga Árnason - Skák er allra meina bót!

 

Helgi Árnason, skólastjóri Rimaskóla, hlýtur Barnamenningarverðlaun Velferðarsjóðs barna árið 2013 fyrir ötult starf í þágu skáklistar sem hluta af skólastarfi. Verðlaununum fylgja ein milljón króna og skulu 500.000 renna til skákstarfsemi í Rimaskóla og 500.000 til Skákskóla Íslands/Skáksambands Íslands. Alls hefur verið úthlutað 36 milljónum úr Velferðarsjóði barna á árinu 2013 en heildarúthlutun frá stofnun sjóðsins nemur um 750 milljónum króna.

 

 

 

Þetta er í 9. sinn sem Barnamenningarverðlaun Velferðarsjóðs barna eru veitt og afhendi Kári Stefánsson verðlaunin í Iðnó í dag ásamt Jóhanni Hjartarsyni. Helgi Árnason hlait verðlaunin að þessu sinni fyrir ötult starf hans í þágu skáklistar meðal barna og þróun greinarinnar sem hluta af skólastarfi. Gildi skáklistarinnar er óumdeilt í skólastarfi og hefur Rimaskóli tekið þátt í öllum Reykjavíkur og Íslandsmótum frá stofnun skólans og unnið til fjölda verðlauna. M.a. hefur Rimaskóli 6 sinnum orðið Norðurlandameistari og 12 sinnum á árunum 2003-13 tekið þátt í Norðurlandamótum og náð þar einstökum árangri sem enginn annar grunnskóli á Norðurlöndum hefur náð.

 

 

Í ræðu sinni þegar Helgi tók við verðlaununum sagði hann:

Af gefnu tilefni og í kjölfar á mikilli skólaumræðu um frammistöðu nemenda í  PISA könnunum og faglegt starf í skólum og lélegt læsi drengja vil ég segja: Skák er allra meina bót. Skákin rúmar svo vel grunnþætti náms eins og rökhugsun, læsi og að mínu mati flesta fleti nýrrar aðalnámskrár. Viðurkenning Velferðarsjóðs barna í dag  færir okkur sem mælum skákinni bót vonandi skrefi nær þeim markmiðum okkar að skák verði gerð að skyldunámsgrein í 1. bekk grunnskóla. Skýrsla nefndar sem falið var að kanna kosti skákkennslu í grunnskólum á Íslandi ber heitið "Skák eflir skóla". Á þessari hátíðarstundu vil ég gera þau að mínum orðum.