Skákþáttur Morgunblaðsins: Magnúsi Carlsen spáð sigri í HM-einvíginu við Anand

Eitt það fyrsta sem Magnús Carlsen og fylgdarlið hans gerði eftir að hafa skráð sig inn á Hyatt Regency-lúxushótelið í Chennai í Indlandi þar sem einvígið um heimsmeistaratitilinn hefst um helgina, var að leita að hlerunar- og njósnabúnaði í híbýlum sínum. Prúðmennið Anand er manna ólíklegastur til að hafa rangt við en Magnús hefur lært lexíu sem skáksagan hefur kennt honum og vill bægja frá sér öllum grunsemdum.

„Ofsóknarbrjálæði" hefur alltaf verið fylgifiskur heimsmeistaraeinvígja. Sundurhlutun ljósahjálms og stóla í „einvígi aldarinnar" í Laugardalshöll 1972 er frægt dæmi; í þriðja einvígi Kasparovs og Karpovs í Leningrad haustið 1986 knúðu dyra hjá aðstoðarmanninum Vladimirov „górillur" tvær og Kasparov sjálfur og veiddu upp úr farangri hans „grunsamlegar glósur". Vladimirov var rekinn úr liði Kasparovs - alsaklaus að flestra mati.

„Toilet-gate", speglunargleraugu, dulsálfræðingurinn Zoukhar, kaffibrúsar, tvö umslög fyrir einn biðleik, jógúrt. Þetta eru hugtök og nöfn sem tengjast öll tortryggni heimsmeistaraeinvígja.

Magnús Carlsen sem er 22 ára er mættur á heimavöll Anands með tölvuver í farangrinum, norskan kokk, foreldrana Henrik og Sigrúnu og systurnar Ellen og Ingrid, umboðsmanninn Espen Agdestein og aðstoðarmennina Jon Ludwig Hammer og Laurent Fressinet. Ýmsir fleiri verða „á kantinum", Kasparov hefur boðað komu sína og Anand hefur ekki vandað honum kveðjurnar en það mun eiga rætur að rekja til ummæla sem Garrí lét falla um taflmennsku hans meðan á HM-einvíginu við Gelfand stóð.

Það er skoðun undirritaðs að nokkur mikilvæg atriði gefi heimsmeistaranum Anand von þó hann sé 95 stigum lægri á stigalista FIDE. Í fyrsta lagi er það heimavöllurinn sem fyrir Magnús Carlsen og þá sem koma til Indlands í fyrsta sinn er framandi menningarsvæði sem tekur tíma að aðlagast. Í öðru lagi reynsla Anands og frábær árangur í heimsmeistaraeinvígjum og snilldar undirbúningur. Hafa ber í huga að Magnús er að heyja sitt fyrsta alvöru einvígi á ferlinum. Anand hefur hinsvegar háð HM-einvígi við Kasparov, Shirov, Kramnik, Topalov og Gelfand.

Engu að síður spá flestir því að Magnúsi sigri og hann verði þannig fyrsti Norðurlandabúinn til að verða heimsmeistari. Í breskum veðbönkum eru sigurhorfur hans taldar 3:1. Til samanburðar má geta þess að sigurhorfur Kasparovs gegn Short árið 1993 voru 4:1.

Norska pressan stendur á öndinni og flykkist til Indlands. Magnús og Anand munu tefla 12 kappskákir með venjulegum umhugsunartíma og hefjast þær kl. 9.30 að íslenskum tíma.

Skákirnar eru á dagskrá 9. nóvember, 10. nóvember, 12. nóvember, 13. nóvember, 15. nóvember, 16. nóvember, 18. nóvember, 19. nóvember, 21. nóvember, 22. nóvember, 24. nóvember og 26. nóvember.

Verði jafnt eftir 12 skákir tefla þeir fjórar at-skákir. Verði enn jafnt taka við tvær hraðskákir, síðan Armageddon-skák. Verðlaunaféð deilist í hlutföllunum 60% - 40%, en 55% - 45% verði jafnt eftir 12 skákir hafa verið tefldar.

Heimasíða einvígisins er:

http://chennai2013.fide.com.

Hægt verður að fylgjast með einvíginu á fjölmörgum vefsíðum.

Helgi Ólafsson [e-mail]

----------------------------------------------

Skákþættir Morgunblaðsins eru birtir á Skák.is viku síðar en í sjálfu Morgunblaðinu.  

Grein þessi birtist í Sunnudagsmogganum, 10. nóvember 2013

Skákþættir Morgunblaðsins