Fjölmenni á skákæfingu hjá Fjölni

Vetrarstarf skákdeildar Fjölnis hófst með fjölmennri skákæfingu í Rimaskóla, sem að vanda eru haldnar á laugardögum kl. 11:00. Rúmlega 30 krakkar mættu og gátu vart beðið eftir því að hefja vetrarstarfið. Þarna voru á ferðinni kunnugleg andlit frá því í fyrra, efnilegir skákkrakkar frá Rimaskóla og Kelduskóla mest áberandi. Í nýliðahópnum voru 12 krakkar og fengu þeir skákkennslu hjá þeim Sigríði Björgu og Hrund inni á bókasafni skólans. Þær Sigga Björg og Hrund fóru á kostum og tóku kennsluna föstum tökum og fylgdust foreldrar ánægðir með kennslunni. Stöllurnar eru á leið til Svíþjóðar um næstu helgi í boði Skákdeildar Fjölnis til að taka þátt í Västerås Open helgarmótinu. Í tómstundasal Rimaskóla tóku 19 krakkar þátt í hraðskákmóti og urðu þau Jóhann Arnar, Hilmir, Nansý og Joshua í efstu sætum eftir skemmtilega keppni. Alls voru veitt 12 verðlaun og hart barist um þau. Foreldrar sáu um að færa krökkunum ávexti. Fyrir og eftir æfingu gátu skákkrakkarnir leikið sér með fótboltaspil sem gerir æfinguna bara ennþá skemmtilegri og lengri því að margir eru mættir hálftíma fyrir æfingu til að hita upp í skák eða fótboltaspili.