Hraðskákkeppni taflfélaga: Úrslitin hefjast kl. 14

Úrslit Hraðskákkeppni taflfélaga hefjast nú kl. 14 í dag. Það eru Goðinn-Mátar og Víkingaklúbburinn sem tefla til úrslita. Viðureignin fer fram í húsnæði Skákskólans.

Hægt verður að fylgjast með gangi mála á Chess-Results en úrvalsaðstæður verða á skákstað. Úrslitum hverrar umferðar verður varpað upp á vegg.

Álit nokkurra skákspekinga hafa borist til viðbótar og svo virðist sem skákspekingarnir þjóðarinnar hallist að sigri Goðans-Máta þrátt fyrir lið Víkingaklúbbsins sé heldur stigahærra á pappírnum. Allir spá þó afar jafnri viðureign!

Björn Ívar Karlsson, Taflfélagi Vestmannaeyja

37,5 - 34,5 fyrir Goðann/Máta. Goðinn/Mátar fara langt á mikilli breidd sem þeir búa yfir. Auk þess eiga Helgi Áss og Þröstur eftir að standa fyrir sínu á fyrstu tveimur borðunum. Víkingaklúbburinn hefur engu að síður innan sinna raða marga frábæra hraðskákmenn en breiddin sigrar í þetta skiptið.

Stefán Bergsson, Skákfélagi Akureyrar

Goðinn-Mátar mun standa uppi sem sigurvegari. Fyrir því eru aðallega tvær ástæður: Mikil breidd og góður liðsandi. Það hefur sýnt sig að það skiptir máli að hafa um 10 sterka hraðskákmenn í hverri viðureign, þannig að það sé hægt að deila álaginu, rugla andstæðingana í ríminu með tíðum innáskiptingum og láta þá tefla mest sem eru í stuði það og það skiptið. Svo skiptir liðsandi alltaf máli og hann er afar góður hjá Goðunum. Spái nokkuð öruggum sigri: 40-32.

Hjörvar Steinn Grétarsson, Taflfélaginu Helli

Þetta verður hörkuviðureign milla tveggja stórfélaga. Þetta eru þau félög sem hafa teflt hvað best í þessari keppni í ár. Úrslitin munu að mínu áliti ráðast á því hvort liðið verður betur mannað á morgun. Ef bæði lið verða fullmönnuð þá tel ég að úrslitin ráðist á því hversu góður Helgi Áss verður, hann hefur hingað til verið frekar slakur í keppninni og á mikið inni. Ég býst við því að Goðinn taki þetta með minnsta mun 37-35 og þar verður Þröstur Þórhallsson með 9,5 vinninga, grjótharður eins og alltaf í hraðskákinni. 

Vonandi gefa flestir sér tíma til að koma og horfa enda um algjört augnakonfekt að ræða þegar þessi lið mætast.

Gunnar Björnsson, Taflfélaginu Helli 

Þetta verður epísk spenna. Víkingaklúbburinn er með heldur stigahærra lið á efri borðunum. Á móti kemur að margir Goð/Mátar eru sterkari hlutfallslega í hraðskák en kappskák. Goðinn/Mátar hefur auk þess töluvert stærri hóp sterkra skákmanna en Víkingar. Liðsstjóri þeirra Jón Þorvaldsson er ákaflega mikill keppnismaður og mikill refur sem slíkur.

En Víkingar hafa söguna með sér. Þeir eru sigurvegarar. Þeir unnu Íslandsmót skákfélaga nokkuð örugglega í vor og lögðu Goðann í úrslitum í fyrra. Gunnar Freyr þekkir ekki og skilur það að lenda í öðru sæti. Hefðin, þótt hún sé ekki löng, er því með Víkingum. Gunnar hefur margsannað sem ákaflega snjall og útsmoginn liðsstjóri sem gefst aldrei upp.

En hvernig fer þá? Ég spái bráðabana 36-36 og að breiddin skili Goðanum/Mátum sigri í bráðabana.